به‌یانناما لقێ ئێك بهه‌لكه‌فتا یادا ژدایك بونا بارزانیێ نه‌مر و سه‌رهلدانا باژێرێ دهوكێ

یادا (110) سالیا ژدایك بوونا بابێ روحى و سیمبولێ نه‌ته‌وێ كورد (مسته‌فا بارزانیێ نه‌مر) و (22) سالیا سه‌رهلدانا دهوكا ره‌نگین و سه‌ربلند و خوراگر ل ته‌ڤایا خه‌لكێ كوردستانێ و تایبه‌ت جه‌ماوه‌رێ دهوكێ و پێشمه‌رگێن قاره‌مان پیروز دكه‌ین.

ژیانا(بارزانیێ نه‌مر) یا پر بوو ژ ئازار و ئاواره‌بون و ئازایه‌تى و خوراگرى و حیكمه‌ت و دووربینی, و كوگایه‌كێ پر ژ هزرا نه‌ته‌وه‌یى, و كه‌لتورێ خو، دیموكراسى, خه‌باتگێرى و پێشمه‌رگایه‌تى بو گه‌لێ خو بجه هێلا, له‌وما بارزانى ب نه‌مرى دناڤ خه‌لكێ كوردستانێ دایه‌ و ب مه‌زنى دلا په‌رێن دیروكا جیهانێ دا هه‌ر دێ مینیت، ئه‌ڤه‌ ژى ژ ئه‌نجامێ كومه‌كا بنه‌ما و پره‌نسیپێن راست و دروست و هه‌لویستێن مروڤ دوستانه‌ یێن بارزانى بوون.

ئه‌ڤرو یادا ژدایك بوونا مروڤه‌كێ مه‌زن و شوره‌شگێر و رێبه‌ره‌كێ بێ وێنه‌ و ژ خانه‌واده‌یه‌كا خه‌باتگێر و نه‌ته‌وه‌ په‌روه‌ر بلند و ب رێز ساخ دكه‌ین, كو بیرو باوه‌ر و رێبازا وى ل سه‌ر بنه‌مایێ مافخوازى و ئازایه‌تى و لێبورینێ هاتیه‌ دانان.

بارزانیێ نه‌مر ب درێژیا نیف چه‌رخى سه‌ركردایه‌تى و رێبه‌رایه‌تیا بزاڤا رزگاریخوازا گه‌لێ كوردستانێ كریه‌, ژپێخه‌مه‌ت ب ده‌ستڤه‌ئینانا ژیانه‌كا ئازاد و پرسه‌رفه‌راز بو خه‌لكێ كوردستانێ.

جهێ شانازیێ یه‌ كو خه‌لكێ دهوكا داسنیا گیانێ سه‌رهلدانێ و فیداكاریێ و به‌رخودانێ دژى سته‌م و زورداریێ ل روژا ژدایك بوونا رێبه‌رێ ملله‌تێ كورد بارزانیێ باب سه‌رهلدان كر و كه‌لهێن شوفینست و زورداریێ ل باژێرێ دهوكێ هه‌رفاندن، و روژه‌كا نوى و ژیانه‌كا پر سه‌رفه‌راز و ئازاد بكه‌نه‌ دیارى بو خوینا شه‌هیدێن رێیا بزاڤا ئازادیخوازا كوردستانێ و بارزانیێ نه‌مر, سه‌رهلدانا جه‌ماوه‌رێ دهوكێ نیشانا مێرخاسى و دلسوزى و فیداكاریا خه‌لكێ ڤێ ده‌ڤه‌رێ یه‌ هه‌مبه‌ر دوزا ره‌وایا خه‌لكێ كوردستانێ و رێبازا پێشه‌وا بارزانیێ نه‌مر.

پیروزه‌ (14) ئادارێ روژا ژدایك بوونا بابێ روحیێ نه‌ته‌وه‌یێ كورد (مسته‌فا بارزانى) .

پیروزه‌ (14)ى ئادارێ روژا سه‌رهلدانا باژێرێ دهوكا خوراگر.