مووسڵ..هەتا نها ٦ هەزار کەس بێ سەروشوێنن
مووسل-KDP.info- ئەندامەکی جڤاتا پارێزگەها مووسڵ ڕاگەهاند، هەتا نها ژمارەکا دروست نینە کو بزانین ژمارا بێ سەروشوێن بوویان د شەڕی دژی داعشێ دا ل مووسلێ چەندە، بەلێ ب گۆڕەی زانیاریان زیدەتر ژ ٦ هەزار کەسانە.
رۆژا، ٣٠ـی ٨ رۆژا جیهانیا بێ سەروشوێین بوویانە، ل چەندین جهێن جیهانێ ژی، ئەڤ رۆژە دهێتە ساخکرن ژبەر وان بێ سەروشوێن بوویێن د شەر و ململانێیان دا.
دڤی بیاڤی ژی دا، خدر ئەلیاس، سەرۆکێ لیژنا ساخلەمیێ ل جڤاتێ، بۆ ماڵپەڕێ فەرمیی یێ پارتی دیموکراتی کوردستان دبێژیت، پشتی ئەو شەڕێ ل مووسڵ ڕوویدایی، زیان و زرار نە بتنێ وێرانبوونا باژاری بوو، بەلکوو چەندین کەس هاتنە بێ سەروشوین کرن و چەندین كه‌س ژی هەیا نها چارەنڤیسێ وان نەیێ دیارە چی ب کوشتن و چ رەڤاندن بیت.
ناڤهاتی دا دیارکرن، ب گۆڕەی زانیاریان ١٢ هەزار کەس لە نافچەیێن رزگاربووی بێ سەروشوێنن، و ژوان ژی ٦ هەزار کەس ژ مووسلن، چونکە زرار و زیانەکا مەزن ب ڤی باژاری کەفت.
گەریان ب دووڤ تەرماندا
هیشتا ئەو باژار بێهنا لەشێن مریان ژێ دهێت، ئەو بێهنە بوویە گەف بۆ باژارێ مووسڵێ ب تایبەت رەخێ راست یێ مووسڵێ، دڤی دەربارەی ژی دا ناڤهاتی دبێژیت، ژبەر تۆپبارانا فرۆکەیان ئەو ئاڤاهی ب تەمامی هاتینە خراپکرن، ئەگەر کەسەک هەبیت دبن وان ئاڤاهیان، خەلک لیژنەیێن ساخلەمێی ئاگەهداردکەن.
دبێژیت ژی، هێشتا گەریان ب دووڤ بێ سەروشوێنان دا بەردەوامە، و خەلک مە ئاگەهدار دکەت دا کو ب دووڤ بێ سەروشوێنان دا بگەرێین.
کەیسێ بێ سەروشوێنبوویان
کەیسێ بێ سەروشوێنبوویان کەیسەک کەڤنە هەتا نها ژی بەردەوامە، لیژنا نێڤدەولەتی یا خاچا سۆر، ڕاگەهاند، عیراق ئێک ژ وان وەڵاتێن جیهانێ یە کو کریزا بێ سەروشوێن بوویا هەی، ژبەر ئەگەرێ ململانێ و ناکۆکیێن بەردەوام بۆ ماوێ چەرخەکی درێژە.
ڕاگەهاندییە، کو بە هەزاران خێزان رۆژا بێ سەروشوێن بوویان ل چەندین جهێن عیراقێ ساخکرن، هەتا نها ژی ئەو هیڤی و ئۆمێد هەنە کو بێ سەروشوێن بوویێن وان ڤەگەرنەڤە.
بێ سەروشوێن بوویێن عیراقێ و ب تایبەت مووسلێ چەندین گومان هەنە، بەشەک ژ وان گومانان بۆ داعشێ دبەن دبێژن:'' دبیت داعشێ ئەو کەسە کربن دزێنداناندا هەتا کو مربن، و بەشەک ژ وان ژی دبێژن: ب ئەگەرێ تایفی هاتینە کوشتن، گومانا هەرە هەستیارتر ئەوە کو ئەو کەس گەهشتبنە دناڤ رێزێن داعشێ دا.
خەلک هەیا نها ژی چاڤەڕێ ڤەگەریانا وانە، ئەڤ ئافرەتە هەتا نها چاڤەرێ ڤەگەریانا خۆشتڤێین خۆیە، و دبێژیت، چوجاران بێ هیڤی نابم ژ خێزانا خۆ کو ڤەگەرێتەڤە.
ئەو بۆ ماڵپەرێ خاچا سۆر دبێژیت، دەرگەهێ من هەر دەم ڤەکریە ژبۆ ڤەگەریانێ و هیچ جارەکێ ماندی نابم ژ لێگەریانا وان، دبن چیایەکی دابن یان دبن هەر ئاڤاهییەکی دابن بتنێ من جەسەدێ وان دڤێت ژبۆ کو دلێ من ئارام ببیت.
هەموو شەڤان بتنێ دکەمە گری، ژبۆ کو زارۆکێن من هەست ب گریا من نەکەن و ئازار و ژانا نەکێشن، هەردەم بەرێ خۆ ددەمە وێنەیێن وان دلێ من پێ ئارام دبێت.
کــاروان بــاعەدری
