جێگری سەرۆكوەزیران لەگەڵ پارێزگاری موسەننا كۆ بووەوە
بەغدا-KDP.info- د. فوئاد حوسێن، جێگری سەرۆكوەزیران بۆ كاروباری ئابووری – وەزیری دارایی، لە دیوانی وەزارەت لە بەغدا پێشوازیی لە بەڕێز ئەحمەد مەنفی جەودە، پارێزگاری موسەننا و شاندی یاوەری كرد.
لە بەردەوامیی جێبەجێكردنی پلانی حكوومەت بۆ جێبەجێكردنی پلانەكانی بەهەماهەنگیكردن لەگەڵ حكوومەتە خۆجێیەكان و دووركەوتنەوە لە مەركەزیەتی بڕیاردان لە بواری دارایی و گواستنەوەی دەسەڵاتەكان بۆ ئەو حكوومەتانە و پێشكەشكردنی باشترین خزمەتگوزاری بۆیان، ئەمڕۆ 4/7/2019، د. فوئاد حوسێن، جێگری سەرۆكوەزیران بۆ كاروباری ئابووری – وەزیری دارایی، لە دیوانی وەزارەت لە بەغدا پێشوازیی لە بەڕێز ئەحمەد مەنفی جەودە، پارێزگاری موسەننا و شاندی یاوەری كرد.
لە دیدارەكەدا كە بەڕێوەبەرانی گشتیی بودجە و ژمێریاریی وەزارەتی دارایی ئامادەی بوون، پارێزگاری موسەننا ڕوونكردنەوەیەكی وردی لەبارەی بارودۆخی دارایی و ئابووریی پارێزگاکەیەوە پێشكەش كرد و ئاماژەی بۆ ئەوە كرد كە كەمیی پرۆژە خزمەتگوزارییەكان گەورەترین كێشەی ئەو پارێزگایەیە.
هەر لەو کۆبوونەوەیەدا گفتوگۆ لەبارەی گۆڕینی شێوازی كاركردنی كرێكاری ڕۆژانە بۆ گرێبەست و قۆرخكردنی ژمارەیەك لە زەوی و خانووبەرەی سەردەمی ڕژێمی پێشوو لە لایەن هەندێك لایەنی نافەرمییەوە كرا. لەوبارەیەوە پارێزگاری موسەننا داوای كرد ئەو شوێنانە بچنە ژێر دەسەڵاتی پارێزگا و لەو ڕێگەیەوە زۆرترین خزمەت پێشكەشی خەڵكی پارێزگا بكرێت.
بەڕێز، جێگری سەرۆكوەزیران، پاڵپشتیی خۆی بۆ ئەو داواكارییانە نیشان دا و هەردوو فەرمانگەی بودجە و ژمێریاریی ڕاسپارد لە پەیوەندیی بەردەوامدا بن لەگەڵ پارێزگار بۆ پێشكەشكردنی زۆرترین خزمەتگوزاری بۆ هاووڵاتییان.
