داهاتیێ عیراقێ د چواردە سالادا پتر ژ ترلیونەک و 300 ملیار دولارا بوویە

دهۆک-KDP.info- ماموستایێ زانینگەهێ و چاڤدێرێ سیاسى راگەهاند، عیراق بتنێ وەلاتەکێ دستورى و قانونى یە لسەر هندەک وێنە و بەرپەران و دروشمێن بێ بنەما، ئەڤ وەلاتە ژ هەمى لایەکى ڤە گەندەل بوویە و ب تایبەت ژلایێ ئابوورى ڤە ژبەر داهاتیێ عیراقێ د 14ـە سالادا پتر ژ ترلیونەک و 300 ملیار دولار بوویە و هەر ملیارەک ئەگەر بۆ چرکەکێ بتنێ دولارەکى خەرج کربایە دا 32 ساڵ پێڤە بورن، کۆ ب هیچ رەنگەکێ عیراق نەشیایە گەشە بکەت، ژبەر تا نوکە دابەشکرنا وەزارەتێن حکومەتا عیراقێ لسەر بنەمایێ عەشائیرى و تائیفى دئێنە بەلاڤکرن.

کێشەیێن حکومەتا عیراقێ نەبتنێ دگەل هەرێما کوردستانێ نە، بەلکو ئاستێ لاوازێ سیاسى یێ عیراقێ و رادەستکرنا حکومەتا عیراقێ ددەستێ وەلاتێن دەرەکیدا مەزنترین کێشەیە بۆ نوکە و پاشەرۆژا ڤى وەلاتى، ژبۆ ڤێ مەرەمێ د.جمعە عەباس بەندى، ماموستایێ زانینگەهێ و چاڤدێرێ سیاسى بۆ مالپەرێ فەرمیێ پارتى دیموکراتى کوردستان گۆت:" هەر چەندە ئەم یێ ل چەرخێ بیست و ئێکێ دا دژین، بەلێ عیراق بتنێ وەلاتەکێ دستورى و قانونى یە لسەر هندەک وێنە و بەرپەران و دروشمێن بێ بنەما، ئەڤ وەلاتە ژ هەمى لایەکى ڤە گەندەل بوویە و ب تایبەت ژلایێ ئابوورى ڤە ژبەر داهاتیێ عیراقێ د 14ـە سالادا پتر ژ ترلیونەک و 300 ملیار دولار بوویە و هەر ملیارەک ئەگەر بۆ چرکەکێ بتنێ دولارەکى خەرج کربایە دا 32 ساڵ پێڤە بورن، بەلێ هەڤوەلاتیێن عیراقێ نزانن ئەڤ پارە دچیتە کیڤە؟".

دەربارەیى بجهئینانا یاسایێ و نە تێکهەلیکرن دگەل سیاسەتێ مامۆستایێ زانینگەهێ خویاکر:" هەر دەستهەلاتەکا د حکومەتا عیراقێ دا هەیى کارێ خویێ دروست بکەت و هەماهەنگى  دگەل ئێک هەبیت دێ هەمى شۆل بدروستى پرێڤە چن، بەلێ پرانیا یاسایێن گرنگ نەهاتینە کارکرن و پتر ژ نیڤا بەندێن دستورى د هەلاویستینە ژبەر نەدەرکرنا قانونێن پێدڤى".

مافێ مرۆڤ و پێکڤەژیانا عیراقێ ب یاسایێ دئاستێ نە رەوادایە وەک دکتوری زەلالکرى:" پەیڤێن دستور و فیدرالیەت و پێکڤەژیان و مافى مرۆڤ و جڤاکا مەدەنى و دەستپاکى و ئازادیا رادەبرینى... هتد، بتنێ هندەک زاراڤێن وەک نڤشتیان هاتینە وەرپێچان د بەریکا بەرپرساندا و ب هیچ رەنگەکێ بەرپرسیارەتى دناڤ حکومەتا عیراقێ دا نەمایە ب هەر سێ دەستهەلاتێن خۆڤە (یاسادانان و بجهئینان و دادوەرى)، دهەمان دەمدا پتر ژ 15 سالایە شەرێ دژە تیرۆرێ هەیى تا نوکە ل گەلەک دەڤەرێن عیراقێ داگیرکرینە و گەلەک بەرپرسێن عیراقى ژى مێشکێ وان تیرۆرا هزرى پر کریە".

جمعە بەندى ئاخفت:" ب هیچ رەنگەکێ عیراق نەشیایە گەشە بکەت، ژبەر تا نوکە دابەشکرنا وەزارەتێن حکومەتا عیراقێ لسەر بنەمایێ عەشائیرى و تائیفى دئێنە بەلاڤکرن و دەولەتا خودان دوو مەزنترین ریبارە تا نوکە هێشکاتى و بێ کارەبى لێ هەیە و کەرتێ چاندنێ ژى گەلەک لاواز بوویە و یا ژ هەمیان سەیرتر لاوازترین لەشکەر لسەر ئاستێ جیهانێ یێ عیراقێ یە، ژبەر ڤان ئەگەران ژیان دگەل وەلاتەکێ وەکى عیراقێ ب زحمەتە".

بەندى بەحسکر، گرنگە حکومەتا هەرێما کوردستانێ د کابینا نوودا بزووترین دەم ئیستراتیژیەتا خو دیار بکەت و کار بۆ بکەت و بۆ هەڤوەلاتیێن هەرێما کوردستانێ هەمى تشتا بروونی دیار بکەت داکو باوەریا خەلکێ هەرێمێ ب دەستهەلاتا وێ بمینیت".

هەلز عەلى سەلیم