سەلاح دەلۆ: یەکڕیزی لایەنە کوردستانییەکان لە کەرکووک گرینگە

کەرکووک- تایبەت بە  kdp.info/ بەمەبەستی یەكخستەوەی نێو ماڵی كوردیی  و لێکنزیکردنەوەی  پارت و لایەنە سیاسییە كوردستانییەكان لە كەركووك، ئەمڕۆ  سەلاح دەلۆ بەرپرسی ئەنجوومەنی کەرکووک - گەرمیانی پارتی دیموکراتی کوردستان سەردانی مەلبەندی یەكگرتووی ئیسلامی کوردستانی لەکەرکووک كرد.

بەمەبەستی پتەوكردنی پەیوەندییەكانی نێوان پارتی دیموكراتی كوردستان و یەكگرتوی ئیسلامی كوردستان  سەڵاح دەلۆ  بە یاوەری جێگر و ئەندامانی ئەنجوومەنی سەركردایەتی كەركووك- گەرمیان سەردانی بارەگای مەڵبەندی  یەكگرتوی ئیسلامی لە کەرکووک  كرد و وەفدەکەی پارتی لەلایەن بەرپرس و كارگێڕانی مەلبەندەوە بەگەرمی  پێشوازی لێكرا. لەم دیدارەدا سەرەڕای وەستان لەسەر پتەوکردنی پەیوەندییەكانی نێوان هەردوولا،  پرسی سیاسی و ئەمنی و خزمەتگوزاری لە شاری كەركووك بە وردی باسی لێوەکرا.

هاوكات سەڵاح دەلۆ باسی لە بایەخ و ئەرکی نیشتیمانی و   گرینگی یەكرێزی لایەنە سیاسییە كوردستانییەكان  کرد و  رۆلی لایەنەکانی لە شاری كەركووك بە گرنگ وەسف كرد لەپێناو رێكخستنەوەی ماڵی كوردیی و بەتایبەتیش لەم کاتەدا کە  لە هەڵبژاردنی ئەمجارەی  ئەنجوومەنی پارێزگای كەركووك بڕیاردراوە لایەنە کوردستانییەکان یەکدەنگ و یەکڕیز و لەیەک لیستی هاوبەشدا بەشداری لە هەڵبژاردنەکان بکەن.