مەکتەبی سیاسی پارتی پەیامێکی پیرۆزبایی ئاراستەی رادیۆی دەنگی کوردستان کرد
هەولێر-KDP.info- مەکتەبی سیاسی پارتی دیموکراتی کوردستان پەیامێکی پیرۆزبایی ئاراستەی رادیۆی دەنگی کوردستان کرد کە ئەمە دەقەکەیەتی:
بەڕێزان: بەڕێوەبەرو ستافی بەڕێوەبردن و سەرجەم كارمەندانی رادیۆی دەنگی كوردستان..
بە بۆنەی (54)هەمین ساڵیادی دامەزراندنی(ئێزگەی دەنگی كوردستان) پیرۆزباییەكی گەرم ئاراستەی ئێوەی بەڕێزو بیسەرانی ئێزگەی دەنگی كوردستان دەكەین، ئومێدەوارین وەك هەمیشە و بەدرێژایی تەمەنی پڕ بەخششیدا، بە هەمان پەیامی بەرپرسانەو دڵسۆزانە بەردەوام بن بۆ خزمەتی زیاترو بەرچاوتر بە كاروانی تێكۆشان و خەباتی گەلەكەمان و هەڵگری بەیداغی ئاشتیخوازی و پێشكەوتنخوازی و سەربەخۆیی بن.
دامەزراندنی ئێزگەی دەنگی كوردستان بە بڕیارورێنمایی (بارزانی نەمر)وسەركردایەتی شۆڕش بەر لە (54)ساڵ هەنگاوێكی گرنگ و كاریگەر بوو شانبەشانی خەباتی سیاسی و چەكداری بزووتنەوەی رزگاریخوازیماندا بۆ داكۆكیكردن لە مافی رەوای گەلەكەمان و جۆشدانی گیانی بەرخۆدان و شۆڕشگێریی بۆ بەدیهێنانی مافەكانمان.
دەنگی كوردستان مێژوویەكی پڕ سەروەری و شانازیە، هەربۆیەش بەدرێژایی تەمەنی كاروبەخششی توانیویەتی خزمەتێكی بەرچاوی بزاڤی نەتەوەیی و كوولتوریمان بكات و هەمیشە دەنگێكی زوڵاڵ و هەقخوازانەی گەلەكەمان بێت بە هەموو پێكهاتە جیاجیاكانیەوە و هەردەم پێشەنگ بێت لە گوزارشكردن و گەیاندنی خواست و ویستی گەلەكەمان بە دەرەوەو جیهان، ئێستاش لەو قۆناغە نوێیەی خەباتی رزگاریخوازیماندا بە هەمان رێباز و پەیامی كوردایەتی و نیشتیمانپەروەرێتی بەردەوامە وەك هەمیشە مینبەرێكی راستبێژی و هاوچەرخانەو سەنگەرێكە بۆ خستنەرووی خواستوویست و ئامانجەكانی خەڵكی كوردستان لە سەربەخۆیی و بونیاتنانی دەوڵەتی سەربەخۆ.
هیوادارین لەو بۆنەیەدا زیاتر و لە گشت روویەكەوە بەرەو پێش بچن و شانبەشانی كەناڵەكانی دیكەی میدیایی رۆڵی ئیجابیانەی خۆتان ببینن لە رەوایی كێشە سیاسیەكەمان و یەكڕیزیی هێزە سیاسیەكان و هۆشیاركردنەوەو هاندانی چالاكی مەدەنی و جەماوەریی و پتەوكردنی زەوینەوبنەماكانی پێكەوەژیان و هەنگاونان بەرەو سەربەخۆیی و گەیشتن بە تەواوی ئاواتەكانمان.
هەمدیسان پاڵپشتی و پشتیوانی تەواوی خۆمان بۆ رادیۆی دەنگی كوردستان دووپات دەكەینەوەو بە هیوای پێشكەوتن و سەركەوتنی زیاتر لە كارەكانتان..
سڵاوودروود لە گیانی پاكی ئەو زاتانەی لەرێی سەروەریی ئەو كاروانە پیرۆزەدا شەكەت و ماندوو بوون و لەو پێناوەشدا سەریان نایەوە...
مەكتەبی سیاسی
پارتی دیموكراتی كوردستان
27/9/2017
