پەیامی پیرۆزبایی پارتی بەبۆنەی جەژنی رەمەزان
هەولێر-KDP.info- مەكتەبى سیاسی پارتى دیموكراتى كوردستان بەبۆنەی جەژنی رەمەزانی پیرۆزەوە پەیامێکی پیرۆزبایی راگەیاند کە تێیدا هاتووە: " ئاواتەخوازین ئەو بۆنە پیرۆزە مایەى یەكگرتووى و خێروخۆشی یەكجارەكى بێت بۆ گەلەكەمان بەتایبەتى لەو هەلومەرجەى ئەمڕۆماندا بۆ بنبڕكردن و یەكلاییكردنەوەى شەڕی داسەپاوی تیرۆریستان و رووبەڕوبوونەوەى قەیرانەكان و گەیشتن بە ئامانج و داخوازیە رەواكانمان."
دەقی پەیامی پیرۆزبایینامەى مەكتەبى سیاسی پارتى دیموكراتى كوردستان
بەبۆنەى جەژنى پیرۆزى رەمەزان
بەبۆنەى هاتنەوەى جەژنى پیرۆزى رەمەزان گەرمترین پیرۆزبایی جەژن لە سەرجەم موسڵمانانى كوردستان و عیراق و جیهان دەكەین، بەتایبەتى لە خانەوادە و كەس و كارى سەربەرزى شەهیدە نەمرەكان و هێزى پێشمەرگەى كوردستان لە بەرەكانى جەنگدا، هیوادارین هەمیشە گەلەكەمان سەرفراز و شاد و بەختەوەر بێت و هەر رۆژێكى جەژن و كامەرانى بێت.
جەژنى پیرۆزى رەمەزان، هەڵگرى پەیامى لێبووردەیی و ئاشتەوایی و خێروبەرەكەتە بۆ گشت مرۆڤایەتى و موسڵمانان، بۆیە ئومێدەوارین زیاتر هەوێنى پێكەوەژیان و دادپەروەرى و دابینكردنى سەقامگیریی و ئاسوودەیی بێت بۆ تەواوى چین وتوێژەكانى كۆمەڵگە و پێكهاتەكانى گەلەكەمان.
ئاواتەخوازین ئەو بۆنە پیرۆزە مایەى یەكگرتووى و خێروخۆشی یەكجارەكى بێت بۆ گەلەكەمان بەتایبەتى لەو هەلومەرجەى ئەمڕۆماندا بۆ بنبڕكردن و یەكلاییكردنەوەى شەڕی داسەپاوی تیرۆریستان و رووبەڕوبوونەوەى قەیرانەكان و گەیشتن بە ئامانج و داخوازیە رەواكانمان.
جارێكى دیكە جەژنى پیرۆزى رەمەزان لە هەموو لایەك پیرۆز بێت...
مەكتەبى سیاسی
پارتى دیموكراتى كوردستان
