پرسه‌ی مه‌كته‌بی سیاسی پارتی، بۆ كۆچی دوایی هونه‌رمه‌ند حاجی مه‌كی
بەڕێزان خانەوادەى هونەرمەندى ناودارى گەلەکەمان حاجى مەکى عەبدوڵڵا
بە داخەوە هەواڵى کۆچی دوایی هونەرمەندى رەسەنى گەلەکەمان (حاجى مەکى)مان پێگەیشت، بەو بۆنە خەمناکەوە پرسەو سەرەخۆشی خۆمان ئاراستەى بەڕێزتان و تێکراى کەس و کارى خوالێخۆشبوو و تەواوى هونەرمەندان دەکەین، خۆمان بە هاوبەشی خەمتان دەزانین و ئومێدەوارین خواى گەورە سەبروئارامى ودڵنەوایی بە ئێوەو هەموو لایەک ببەخشێ.
حاجى مەکى ناسراو بە(عەلییەفەنى) یەکێک بوو لە هونەرمەندە زێدە دیارەکانى بوارى شانۆودراما لە کوردستان و هەر لە سەردەمێکى زووەوە دەستى بەکارى هونەرى کردووە و بە سەدان کارى هونەریى و داهێنەرانەى لە تەلەفزیۆن و سەرتەختەى شانۆو سینەما ئەنجام داوە، کاروبەرهەمەکانى ئەو هونەرمەندە بە درێژایی کاروانى هونەری کوردیی مایەى رەزامەندى و خۆشحاڵى بینەران و جەماوەرى کوردستان و نەوە لە دواى نەوە بووە، هەروەها شانبەشانى هونەرە دەوڵەمەند و بەپێزەکەى خزمەتێکى زۆریشى بە کاروانى خەبات و تێکۆشانى گەلەکەمان و کوردایەتى گەیاندووەو لە پێناوى ئەو کاروانە شکۆدارەى رێبازى پارتى و بارزانیدا نەسرەوتووە و کۆڵی نەداوە، بەمەش جێپەنجەى لەو بوارەدا هەرە دیارو روون و بەرچاوە.
جارێکى دیکە سەرەخۆشى لە بنەماڵەى خوالێخۆشبوو دەکەین و داواکارین لە خواى گەورە گیانى کۆچکردوو بەبەهەشتى بەرین شاد بکات.
مەکتەبى سیاسی پارتىی دیموکراتى کوردستان
19/12/2015
