كوردستانیانی تاراوگە بە پەرۆشەوە روو لە سندووقەكانی دەنگدان دەكەن

رۆتەردام-KDP.info-  هێمن هەورامی مۆژدەی ئەوەی دا كە زۆربەی بەشداربووانی دەنگدانی تاراوگە، رۆڵەكانی پارتی و بارزانین و بە حەماسەتێكی بەرزەوە ئامادەی دەنگدان بوون.

لە 27/4/2014 و لە شاری رۆتەردامی هۆڵەندا لە دۆخێکی دیموكراسیانەدا هاونیشتیمانیانی عێراقی و كوردستانی، نیشتەجێی وڵاتانی دەرەوە روویان لە سندووقەكانی دەنگدان كرد و دەنگی خۆیان دا بۆ پەرلەمانی عێراقی.

بەرپرسی لێژنەی باڵای هەڵمەتی هەڵبژاردن بۆ لیستی 213 ی پارتی لە دەرەوەی وڵات، هێمن هەورامی، بەشداری ئەو هەڵبژاردنەی كرد و لە یەكێك لە بنەكانی دەنگدان دەنگی خۆی دا.

هەورامی كە هاوكات ئەندامی ئەنجوومەنی سەركردایەتی و بەرپرسی مەكتەبی پەیوەندییەكانی پارتی دیموكراتی كوردستانە، لە لێدوانێكدا بۆ كەناڵەكانی بە بایەخەوە باسی بەشداریكردنی هاووڵاتیانی تاراوگەنشینی كرد، بە تایبەتی كوردستانیانی خۆشەویست كە بە جۆش و خرۆشێكی زۆرەوە بەشداری ئەم دەنگدانە دەكەن.

هەورامی هاوکات مۆژدەی ئەوەی دا كە زۆربەی بەشداربووانی دەنگدانی تاراوگە رۆڵەكانی پارتی و بارزانین و بە حەماسەتێكی بەرزەوە ئامادەی دەنگدان بوونە، وێڕای ئەوەی كە زۆربەی كوردستانیان لە شار و وڵاتانی دیكەوە هاتوونەتە بنكەكانی دەنگدان بە هۆی كەمیی وێستگەكانەوە.

گوتیشی، بەپێی بەرنامە و پلانێكی پێشتر ئامادەكراو رێوشوێنی تایبەت گیراوەتە بەر بۆ گوازتنەوەی كوردستانیان بۆ ناوەندەكانی دەنگدان.

هەورامی ئەوەیشی راگەیاند كە هیچ دەنگدەرێكی كورد لە بیر نەكراوە بۆ گوازتنەوەی بۆ دەنگدان.

سەنگەر هەورامی