سه‌ربه‌ست له‌زگین : لیستا برایه‌تی و پێكڤه‌ژیانێ دێ مافێن گه‌لێ كورد و پێكهاتێن ده‌ڤه‌رێ پارێزیت

زاخو-KDP.info/ به‌رپرسێ لقێ 8ێ پارتی ل زاخۆ د سمیناره‌كی دا ل لیژنا ناڤخۆیا سه‌رده‌م یا پارتی لدۆر هه‌لبژارتنێن جڤاتا پارێزگه‌ها میسل بۆ هژماره‌كا ئاواره‌یێن پارێزگه‌ها ناڤهاتی ل زاخۆ خۆیاكر كو لیستا برایه‌تی و پێكڤه‌ژیانێ دێ مافێن گه‌لێ كورد و پێكهاتێن ده‌ڤه‌رێ پارێزیت و لقێ 8ێ پارتی هه‌می ئاماده‌كاری كرینه‌ بۆ رۆژا هه‌لبژارتنان و ئاسانكاریێن هاتن و چوونێ و خزمه‌تكرنا ده‌نگده‌ران.

سه‌ربه‌ست له‌زگین به‌رپرسێ لقێ 8ێ پارتی دیموكراتی كوردستان ل زاخۆ د سمینارێ دا ب درێژاهی باس ل هه‌لبژارتنێن جڤاتا پارێزگه‌ها میسل و چه‌وانیا خوه‌ ئاماده‌كرن و هاندانا هاولاتیان كر بۆ سه‌ر سندوقێن ده‌نگدانێ د 20/6/2013ێ دا و گۆت: هه‌لبژارتنێن جڤاتا پارێزگه‌هێ بۆ مه‌ زۆر د گرنگن و ده‌نگدان بۆ لیستا برایه‌تی و پێكڤه‌ژیانێ یا ژماره‌ 469 ده‌نگدانه‌ بۆ پاراستنا مافێن گه‌لێ مه‌ و پێكهاتێن دی یێن ده‌ڤه‌رێ ئه‌وێن ل ده‌رڤه‌یی ئیدارا هه‌رێمێ چونكی ئه‌ڤ هه‌لبژارتنه‌ چاره‌نڤیسن بۆ مه‌ و داخواز ژ وان كر ب شێوه‌یه‌كێ به‌رفرهـ پشكداریێ د ڤێ پرۆسێ دا بكه‌ن ود ه‌نگ بده‌ن بۆ لیستا برایه‌تی و پێكڤه‌ژیانێ و كاندیدێن پارتی ل سنورێ لقێ 14 یێ پارتی ل میسل یێ ژماره‌ 6 بشار كیكی و ل ده‌ڤه‌را زومار و دیجله‌ ل سنورێ لقێ 17 یێ پارتی ناریمان مسته‌فا یا ژماره‌ 46 و ته‌حسین حه‌سه‌ن حه‌مو یێ ژماره‌ 28 د لیستا 469 دا.

سه‌ربه‌ست له‌زگین گۆت ژی؛ لقێ 8ێ پارتی هه‌می ئاماده‌كاری كرینه‌ بۆ روژا هه‌لبژارتنان و ئاسانكاریێن هاتن و چوونێ و خزمه‌تكرنا ده‌نگ ده‌ران ژ پێخه‌مه‌ت سه‌رئێخستنا پرۆسا هه‌لبژارتنێن جڤاتا پارێزگه‌ها میسل.

سه‌ربه‌ست له‌زگین د ته‌وه‌ره‌كێ دی دا باس ل ره‌وشا سیاسییا هه‌رێما كوردستانێ و عێراقا فیدرال كر و ئاماژه‌ ژی دایه‌ وان پێشڤه‌چوونێن هه‌رێمێ ب خوه‌ ڤه‌ دیتین د هه‌می بواراندا و دیار كر كو حكومه‌تا هه‌رێما كوردستانێ باشترین خزمه‌تگوزاری پێشكێشی هاولاتیێن كوردستانێ دكه‌ت ب گشتی و هه‌ره‌وسا پرۆژه‌یێن خزمه‌تگوزاری ل ده‌ڤه‌رێن ده‌رڤه‌یی ئێدارا هه‌رێمێ ژی ئه‌نجامداینه‌.

به‌رپرسێ لقێ 8ێ پارتی دیموكراتی كوردستان ل زاخۆ باس ل سه‌ره‌دانا نێچیرڤان بارزانی سه‌رۆكێ حكومه‌تا هه‌رێما كوردستانێ كر بۆ ده‌ڤه‌را زاخۆ ژبۆ ڤه‌كرنا نه‌خوشخانا (200) ته‌ختی و دانانا به‌رێ بنیاتێ بۆ تونێلا گه‌لیێ زاخۆ و دیاركر كو حكومه‌تا هه‌رێما كوردستانێ به‌رده‌وامه‌ ل سه‌ر پێشكێشكرنا باشترین خزمه‌تگوزاری ژبۆ خوه‌شكرنا ره‌وشا ژیانا هاولاتیان د هه‌می بواراندا.