ڕۆنکرنه‌ک ل سه‌ر جڤینا د ناڤبه‌را ئه‌نجوومه‌نێ بزاڤا گۆڕان ل هۆڵه‌ندا ئوو خاتوون ئاتتیا گامر ل ڕێکه‌فتی ١٧-٥-٢٠١٣ ل باژارێ هارلێم
د به‌لاڤه‌کرنا وێ جڤینێ دا لسه‌ر مالپه‌را گۆڕان ئوو ئاژانسا ئانا کۆ گردێدای ئاشووریانه دوژمناتیا حکوومه‌تا هه‌رێما کوردستانێ تێ کرن نه‌خاسم کۆ ئاشووری بێ مافن ل هه‌رێما کوردستانێ ئوو هه‌ر وه‌سا د به‌لاڤۆکا وان ده بزاڤا گۆڕان داخوازا ده‌ستتێوه‌ردانا ده‌ره‌کی دکت ل سه‌ر پرۆسه‌یا سیاسی ئوو یاسایی یا هه‌رێما کوردستانێ.
ب ڤێ نڤێسینێ ئه‌م دخوازن بۆ هه‌می کوردستانیان ئوو هه‌می ئالیه‌کێ ڕون ئوو ئاشکه‌را بکن کۆ د ڤان سالێن بۆری دا دژمناتیه‌کا مه‌زن ل دژی کریستیانێن ل ناڤه‌راست ئوو باشوورێ ئیراقێ د هاته کرن. ئه‌و دژایه‌تیێ گه‌هشته ئاسته‌کێ کۆ ب مخابنی کرستیانێن ئیراقێ قووربانی دان ئوو که‌نیسێن وانا هاتن ته‌قاندن ئوو وێرانکرن.
ژ به‌ر ڕەوشا خراب یا کریستیانان ل ناڤه‌راست ئوو باشوورێ ئیراقێ، وانا هاوارا خوه گەهانده حکوومه‌تا هه‌رێما کوردستانێ.
ژ ئالیێ حکوومه‌تا هه‌رێما کوردستانێ ڤه هه‌می ده‌رگه‌ه بۆ وانا هاتن ڤه‌کرن ئوو ب که‌یفخوشی ئوو مێڤانداریه‌کا گه‌رم پێشوازی ل وانا هاته کرن ئوو هه‌می پێداویستیێن ژیانێ بۆ وانا ل کوردستانێ هاتن دابینکرن.
ب تایبه‌تی سه‌رۆکێ هه‌رێما کوردستانێ ڕێزدار مەسعود بارزانی هه‌رده‌م بانگه‌وازیا هندێ دکر ئوو دکت کۆ پێویسته ڕێز ل وانا بێته گرتن وه‌ک هه‌ر هه‌وه‌لاتیه‌کێ کوردستانێ.
هەروەسا به‌لاڤۆکا جڤینا د ناڤبه‌را بزاڤا گۆڕان ل هۆڵه‌ندا ئوو خاتوون ئاتتیا گامر ڕادگه‌هینت کۆ خاتوون ئاتتیا گامر دژایه‌تیا ئه‌زموون ئوو پێشکه‌فتنا هه‌رێما کوردستانێ دکت ئوو وێ خزمه‌تا حکوومه‌تا هه‌رێما کوردستانێ بۆ کرستیانێن ئیراقێ کری ل به‌ر چاڤا نا بینت.
ب مخابنی ئه‌م د بینن کۆ بزاڤا گۆڕان ل هۆڵه‌ندا ژ به‌ر که‌رب ئوو کینا خوه یا ل گه‌ل پارتیێن ده‌ستهه‌لاتدار ل کوردستانێ ئوو لاوازبوونا خوه، هه‌ڤالبه‌ندیێ ل گه‌ل وان که‌سانا دکت ئه‌وێن ل دژی پرسگرێکا گه‌لێ کورد ل هه‌ر چار پارچه‌یێن کوردستانێ خه‌باتێ دکن.
ئەم هه‌ز دکن هه‌می ئالیه‌کێ ئاگه‌هدار بکن ئوو ب تایبه‌تی بزاڤا گۆڕان ل هۆڵه‌ندا هشیار بکن کۆ بریارێن ل سه‌ر ده‌ستوورێ کوردستانێ ئوو هه‌لبژارتنا سه‌رۆکێ هه‌رێما کوردستانێ ب ته‌نێ مافێ گه‌لێ کورده ئوو هیچ ئالیه‌کێ ده‌ره‌کی ماف نینه ده‌ستتێوه‌ردانێ تێدا بکت.
وه‌ک تێت زانین خاتوون ئاتتیا گامری ئه‌نداما ئه‌نجوومه‌نێ پارێزگه‌ها باکوورێ هۆڵه‌ندا یه ل سه‌ر لیستا پارتیا کار یا هۆڵه‌ندی ( Pvda) یه ئوو نه ئه‌نداما په‌رله‌مه‌نتۆیا هۆڵه‌ندایێ یه وه‌ک د به‌لاڤۆکێ ده هاتی ڕاگه‌هاندن.
د په‌یوه‌ندیه‌کێ ده ل گه‌ل برێز گوهدار مەعسووم هه‌ر ئه‌ندامێ ئه‌نجوومه‌نێ پارێزگه‌ها باکوورێ هۆڵه‌ندا ل سه‌ر لیستا (Pvda) ب مه ڕاگه‌هاند کۆ ئه‌و جڤینا د ناڤبه‌را بزاڤا گۆڕان ئوو خاتوون ئاتتیا گامر ده نه ل سه‌ر ناڤێ پارتیا (Pvda) هاتیه کرن.
برێز گوهدار مەعسووم گۆت کۆ فراکسیۆنا (Pvda) یا ئه‌نجوومه‌نی نه هاتیه ئاگه‌هدارکرن ل سه‌ر ڤێ جڤینێ ئوو ل سه‌ر ڤێ چه‌ندێ ژ داخوازا لێبۆرینێ ژ گه‌ڵێ کورد خوه‌ست ئوو گۆت کۆ ئه‌و گۆتن یێن خاتوون گامری یێن شه‌خسینه ئوو نه هه‌لوێستێ پارتیا (Pvda)یه.
بزاڤا گۆڕان ل کوردستانێ ئوو ده‌رڤه‌ی کوردستانێ ب گۆتنێن بێبن دخوازن ڕیێ جوان و گه‌شێ هه‌رێما کوردستانێ ڤه‌شێرن بۆ مه‌ره‌مێن تایبه‌ت ئوو خوه وه‌ک بزاڤه‌کا ڕێکخستی ئوو ڕێکووپێک نیشان بده‌ن.
گۆڕان د جڤین ئوو ڕاگه‌هاندنا خوه ده هه‌رده‌م به‌هسێ مافێ مرۆڤان ئوو ده‌مۆکراتیێ ئوو دژایه‌تیا گه‌نده‌لیێ یا ل هه‌رێما کوردستانێ دکت د ده‌مه‌کێ ده کۆ ئه‌ڤ چار ( ٤ ) سال ده‌رباسبوون ژ جوودابوونا وێ ژ ینک. د ڤان چار سالان ده بزاڤا گۆڕان نه کاریه یه‌ک کۆنگره‌یه‌کا ده‌مۆکراتیانه سازبدت کۆ ئه‌ندامێن سه‌رکردایه‌تیا وێ بێن هه‌لبژارتن ب ڕەنگه‌کێ ده‌مۆکراتیانه. وه‌ک ئه‌م د ڕاگه‌هاندنا کوردی ده د بینن کۆ هه‌ر دچه کادرێن گۆڕان ده‌ست ژ کاران ڤه‌دکێشن ئوو ڕوژ ب ڕوژ بزاڤا وان لاوازتر دبت.
گۆڕان ل دیاسپۆرا یێ یا ده‌ست کوردایه‌تیێ به‌ردای ئوو ب ته‌نێ پارتیاتیێ دکت ئوو لۆبیکرن ئوو به‌رژه‌وه‌ندیێن بلند یێن کورد ئوو کوردستانێ نه خه‌مه بۆ وان.
ئەڤ کریارێن گۆڕان نها ئه‌نجام دده‌تن د ده‌مه‌کێ ده کۆ پێویسته هه‌می ئالیێن سیاسی ئوو جڤاکی یێن کوردی ل دیاسپۆرا یێ یه‌ک ده‌نگ ئوو یه‌ک هه‌لوێست بن بۆ پاراستنا یه‌که‌تیا گه‌لێ کورد ئوو پاراستنا ده‌ستکه‌فتێن هه‌رێما کوردستانێ ئوو هه‌ر وه‌سا ئالیکاریکرنا پارچه‌یێن دن یێن کوردستانێ ژ بۆی ده‌ستخستنا مافێن وان یێن ڕوا.
پارتیا ده‌مۆکراتا کوردستانێ
ناوچا هۆڵه‌ندا
٢١ گولانێ ٢٠١٣
__2021_04_03_h23m18s5__JH.jpg)
