به‌رپرسێ لقێ ئێك پێشوازیا شانده‌كێ نوژدارێن نه‌خوشخانا ئه‌لمانى ل دهوكێ كر

دهوك-KDP.info/ ئه‌ڤرو سپێدێ ل روژا چارشه‌مبى رێكه‌فتى(8/5/2013) ل باره‌گایێ لقێ ئێكێ پارتى به‌رێز(عبدالخالق بابیرى)ئه‌ندامێ جڤاتا سه‌ركردایه‌تیا پارتى دیموكراتى كوردستان و به‌رپرسێ لقێ ئێكێ پارتى پێشوازى ل شانده‌كێ نوژدارێن نه‌خوشخانا ئه‌لمانى یا تاییبه‌ت ل پارێزگه‌ها دهوكێ كر كو شاندێ ناڤبرى یێ پێك هاتى بوو ژ نوژداران(پروفیسور د.راینه‌ر شمیتس راوێژكارێ نشته‌گه‌ریان)و( د.مێد توخ) و(دكتورا تاڤگه‌ نه‌قشه‌به‌ندى).
دپه‌یڤه‌كێ دا و وێراى ب خێرهاتنێ ل مێهڤانێن ناڤبرى به‌رپرسێ لقێ ئێك خوشحالیا خو ب ڤێ سه‌ره‌دانێ دا دیاركرن و ده‌ست خوشى ل گشت نوژدارو ستافێ نه‌خوشخانا ئه‌لمانى یا تاییبه‌ت كر بو وێ خزمه‌تا ته‌ندروستى یا باش پێشكێشى خه‌لكێ ده‌ڤه‌رێ دكه‌ت و هه‌روه‌سان(عبدالخالق بابیرى) گوت ڤه‌كرن و دانانا نه‌خوشخانێن بیانى ب شێوێ ستانده‌ر ل سه‌ر ئاستێ پیڤه‌رێن ئامیرێن ته‌كنه‌لوژیایێ یێن پێشكه‌فتى ژ پێداویستیێن هه‌ر تاكه‌كى و هه‌ر جڤاكه‌كینه‌ نه‌خاسمه‌ خه‌لكێ پارێزگه‌ها دهوكێ و هه‌روه‌سان به‌رپرسێ لقێ ئێك داخاز ژ شاندێ مێهڤان كر كو هه‌مى هه‌ول و شیانێن خو ب مه‌زێخن بو دابین كرنا ته‌ندروستیه‌كا باش بو خه‌لكێ ده‌ڤه‌رێ و رزگاركرنا هاولاتیان ژ نه‌خوشیێن پێ توش دبن و دبنه‌ ئه‌گه‌رێ نه‌خوشكرنا ژیانا هاولاتیان.
هه‌روه‌سان ژ لایێ خوڤه‌ شاندێ نوژدارێن نه‌خوشخانا ئه‌لمانى یا تاییبه‌ت سوپاسیا به‌رپرسێ لقێ ئێكێ پارتى كر بو ڤێ پێشوازیا گه‌رما لێ كرى و دیار كر كو مه‌ره‌م ژ ڤێ سه‌ره‌دانێ خورتكرنا په‌یوه‌ندیانا دگه‌ل پارتى دیموكراتى كوردستان ب تاییبه‌تى لقێ ئێكێ پارتى و ل دوماهیێ ژى (عبدالخالق بابیرى) ئاماده‌یى و پشته‌ڤانیا خو بو هه‌ر جوره‌ هاریكاریه‌كا پێتڤى دا دیاركرن.