راگەیاندراوی دەزگای رۆشنبیری و راگەیاندنی پارتی دیموكراتی كوردستان بەبۆنەی ساڵوەگەڕی رۆژی رۆژنامەگەری كوردییەوە

هەموو ساڵێك لە 22ی نیساندا كە هاوكاتە لەگەڵ دەرچوونی یەكەم رۆژنامەی كوردی لەسەر دەستی مقداد مەدحەت بەگی بەدرخان لە ساڵی 1898دا، یادی رۆژی رۆژنامەگەری كوردی دەكەینەوە و بە شانازیەوە ئاوڕ لە تەمەنی ئەو كاروانە بەردەوام و پڕ بەرهەمە دەدەینەوە و قۆناغ و دەستكەوتەكانی بەرز دەنرخێنین و بە گەشبینی و هیواوە لە ئاییندەكەی دەڕوانین.

رۆژنامەگەری كوردی لە ماوەی 115 ساڵی رابردوودا رێگایەكی سەختی لە بونیاتنان و خۆڕسكانددا بڕیوە بۆ داڕشتنی بنەماكانی ئیتیكی رۆژنامەگەری كە پیشەوەری و راستگۆیی و بەرپرسیارێتی بنەماكانی كار بن. لەو تەمەنەیدا پێشەنگی ئەو دامەزراوە كۆمەڵایەتی و سیاسی و كولتوریانە بووە كە كاریان بۆ هۆشیاركردنەوە و بەرچاورۆشنكردنەوەی تاكەكانی كۆمەڵگای كوردستانی كردووە.

لە رەوتی بەرەوپێشچوونی هزری نەتەوایەتی و ئازادیخوازانەی كوردەواریدا، رۆژنامەگەری كوردی ئامڕازێكی كاریگەر و داكۆكیكارێكی شێلگیر و پارێزەر و پەرەپێدەری زمان و كولتور و هونەر و كایە جیاجیاكان بووە.

لەقۆناغی تێكۆشانی شاخ و پێشمەرگایەتیدا، رۆژنامەگەری كوردی لە ناو بزوتنەوەی رزگاریخوازی گەلەكەماندا سەنگەرێكی بەرگری و بڵندگۆیەكی دلێری جۆشدانی گیانی بەرخودان و ئامڕازێكی گرینگی پەیوەندی نێوان جەماوەر و شۆڕش و گەیاندنی هەواڵ و چالاكیەكی و سەركەوتنەكانی پێشمەرگە و دەرخستنی راستیەكان و هەڵدانەوەی پەردە بوو لەسەر سیاسەتی رژێمە یەك لەدوا یەكەكانی عێراق و هەموو نەیارانی كورد و كوردستان.

لەسەردەمی خەباتی دیموكراسی و بنیاتنانی وڵات و دانانی ستونەكانی حوكمڕانی خۆماڵی و ئازادیدا، رۆژنامەگەری كوردی رۆڵی یەكجار كاریگەری هەبووە و چاودێرێكی رەخنەگرە بەسەر ژیانی سیاسی و حزبی و رێكخراوەكانی كۆمەڵگای مەدەنی و پەرلەمان و حكومەت و دەزگا و فەرمانگەكانەوە و لە پێگەی خۆیدا وەكو دەسەڵاتی چوارەم رۆڵ دەگێڕێت. هەمیشە ئەوەشی لێ چاوەڕواندەكرێ كە لەتوانایدایە كاری مەزنتر و بەرهەمی بەپێزتر پێشكەش بكات و سەروەرییەكانی ئەم بوارە زیاتر بكات و لێكەوتەكانی بەسەر ژیانی سیاسی و كۆمەڵایەتی و كولتوریوە ئەرێنیتر و جێپەنجەی بە شێوازی ژیان و هۆشیاری كۆمەڵگا و پڕۆسەی گەشەپێدان و چاكسازی و رێكخستنەوەی نێوماڵی كوردستانی زیاتر دیار و بەرچاوبێت.

لەكاتێكدا بە بۆنەی 115 ساڵەی رۆژنامەگەری كوردییەوە، پیرۆزبایی لە خۆمان و سەرجەم رۆژنامەنوسانی كوردستان دەكەین، دووپاتی دەكەینەوە پشتیوانی لە ئازادی و فراوانكردنی زەوینەی كاری رۆژنامەگەری و ئەو یاسایەنە دەكەین كە ئامانج لێیان رێكخسنتی ئەم بوارە گرینگە و دەستنیشانكردنی بەرپرسیارێتی كۆمەڵایەتی و سیاسی رۆژنامەنوسان و رێگری پێشێلكارییەكانە. هەروەها جەخت دەكەینەوە كە بنەماكانی ئیتیكی كاری رۆژنامەگەری و بەڵێننامەی شەڕەفی كاری رۆژنامەگەری و چاودێریكردنی رەخنەگرانە و هەموو پایە و پێوەرەكانی دیكەی كاری ئەم بوارە، بەشێكی دانەبڕاون لە بەرپرسیارێتی كۆمەڵایەتی و سیاسی و ئەخلاقی كە فەزایەك لە متمانە و پەیوەندی دیموكراسی لە نێوان كۆمەڵگا و هەموو دامەزراوە سیاسی و كۆمەڵایەتی و پێكهاتە ئیتنیكی و ئایینی و كولتوریەكاندا پەیدا دەكات و بەردەوام پەرەی پێدەدات بە ئاراستەی هەرچی زیاتر تەبایی و پێكەوەژیان و رێزگرتن لە تایبەتمەندییەكان و دووركەوتنەوە لە تانەوتەشەر و بڵاوكردنەوەی گیانی رق و كینە و توندوتیژی و رەتكردنەوەی یەكتر و تێكشكاندنی پێوەرەكانی پێكەوەژیانی كۆمەڵایەتی و سیاسی.

دووبارە یادی 115 ساڵەی رۆژنامەگەری كوردی لە خۆمان و هاوكار و هاوپیشەكانمان لە هەر رۆژنامە و گۆڤار و ناوەندێكی میدیایی كاردەكەن، پیرۆز دەكەین و، سڵاو و وەفای خومان ئاراستەی سەربازە ونەكان و هەموو ئەو بەڕێزانە دەكەین كە تواناكانیان لە پێناو بەردەوامی و پێشخستنی رۆژنامەگەری كوردیدا خستۆتە گەڕ.

 

دەزگای رۆشنبیری و راگەیاندنی

پارتی دیموكراتی كوردستان