مەكتەبی سیاسی پارتی دیموكراتی كوردستان ساڵی نوێی كوردانی ئێزیدی پیرۆز دەكات

بە بۆنەی هاتنەوەی چارشەمبا سوور، ساڵی نوێی كوردانی ئێزیدی، ئێمە لە مەكتەبی سیاسی پارتی دیموكراتی كوردستان بە ناوی خۆمان و گشت ئەندامان و لایەنگرانی پارتیمانەوە پیرۆزبایی گەرم لە یەكە یەكەی كوردانی ئێزیدی لە هەرێمی كوردستان و عێراق و جیهان دەكەین و ئومێدەوارین ئەم جەژنە بە خێر و بێر بۆتان بگەڕێتەوە و بە ئاسوودەیی و ئارامی و لەسایەی حكومەتی هەرێم و دەستكەوتە گەورەكاندا یادی بكەنەوە و مایەی هەرچی زیاتر قووڵكردنەوەی گیانی برایەتی و پێكەوەژیانی ئاشتیانەی نێوان هەموو پێكهاتە نەتەوەیی و ئایینییەكانی كۆمەڵگاكەمان بێ.

كوردانی ئێزیدی بەشێكی رەسەنن لە نەتەوەی كورد و لە مێژووی خەبات و بەرخودان و شۆڕشەكاندا دژی زوڵم و ستەم و پاكتاوكردنی نەتەوەیی رۆڵی كارایان هەبووە.

كوردانی ئێزیدی لەسەر دەستی حوكمڕانە شۆفێنییەكان دووچاری دووجار زوڵم بوونەتەوە، یەكێكیان لەبەر ئەوەی كوردن، دووەمیش لەبەر ئەوەی ئێزیدین و دەرەنجام قوربانی زۆریان داوە كە شایستەی رێز و قەدرگرتنی زۆرە و وەكوو شانازییەكی گەورە لە مێژووی گەشی گەلەكەمان و بزووتنەوەی رزگاریخوازی كوردستانیدا تۆماركراوە.

بۆیە مافی سروشتی خۆیانە كە سوودمەند بن لە هەموو دەستكەوتەكان و بەشداربن لە بونیاتنانی وڵات و گەشەپێدانیدا. لەو پێناوەشدا پارتیمان پارتی دیموكراتی كوردستان پشتەوانی كردنی ئەو مافانە بە ئەركی حاشاهەڵنەگری خۆی دەزانێ و كار بۆ بەدیهێنانیان دەكات.

جارێكی دیكە پیرۆزبێ هاتنەوەی چوارشەمبا سوور و ساڵی نوێی كوردانی ئێزیدی.

 

مەكتەبی سیاسی

پارتی دیموكراتی كوردستان