مه‌كته‌بی سه‌رۆك، سه‌ره‌خۆشی له‌ خانەوادەی خەلەفێ زێباری ده‌كات

بەڕێزان خانەوادەی خوالێخۆشبوو خەلەفێ زێباری

بەداخەوە هەواڵی کۆچی دوایی خەلەف یاسین بانی زێباری، ناسراو بە (خەلەفێ زێباری)مان پێگەییشت.
خوالێخۆشبوو خەلەفێ زێباری، لەسەرەتای لاوێتییەوە بووە پێشمەرگە و بەشداریی لە شۆڕشی مەزنی ئەیلوول کرد و یەکێک بوو لە بێژەرەکانی ڕادیۆی دەنگی کوردستان. بە درێژایی تەمەنیشی وەک نووسەر و شاعیر و تێکۆشەرێک، بەهەمان گیانی پێشمەرگانەوە بەرگریی لە مافەکانی گەلەکەمان دەکرد و یەکێک بوو لە دامەزرێنەرانی بەشی کوردیی ڕادیۆی دەنگی ئەمەریکا و بێژەرێکی دیاری ئەو ڕادیۆیە بوو.
لەم بۆنە خەمناکەدا پرسە و سەرەخۆشیی خۆمان ئاراستەی خانەوادە بەڕێزەکەتان و سەرجەم خزمان و کەسوکارتان دەکەین و خۆمان بە هاوبەشی خەمتان دەزانین.
لەخوای گەورە داواکارین گیانی کاک خەلەف بخاتە بەر ڕەحمەتی خۆی و ئارامی و ئۆقرەییش بەهەموو لایەک ببەخشێت.

انا للە وانا الیە راجعون

مەکتەبی سەرۆک