خێزانی شاری كەركووك لە هەولێر هاوكاری كران

هەولێر-KDP.info- پاش ئاوارەبوونیان بۆ شاری هەولێر و نیشتەجێبوونیان لە نێو شارەكەدا، تیمەكانی دەزگای خێرخوازیی بارزانی هاوكاریی جۆراوجۆری ١١٠ خێزانی كەركووكی لە گەڕەكی سەری بڵند لە شاری هەولێر كرد.

ڕێككەوتی ١٩/١٠/٢٠١٧ لە بەردەوامیی هەڵمەتە خێرخوازییەكانیدا بۆ بەهاناوەچوونی زیاتری خێزانەكانی شاری كەركووك، كە بە هۆی بارودۆخ و نالەباریی ڕەوشی ئاسایش لە شارەكەیاندا ماڵوحاڵیان جێ هێشتووە و ڕوویان لە شاری هەولێر كردووە، تیمەكانی دەزگای خێرخوازیی بارزانی لە ساتەوەختی گەیشتنیان و پاش نیشتەجێبوونیشیان لە هوتێل و یەكەكانی نیشتەجێبوون، ڕۆژانە بە چەندین وەجبە خۆراك و پێداویستیی ڕۆژانەیان بەسەردا دابەش دەكات، لە درێژەی پرۆسەكانی دابەشكردنی هاوكارییەكانیشدا لە گەڕەكی سەری بڵند لە شاری هەولێر دەست كرا بە دابەشكردنی خۆراك و بەتانی بەسەر ١١٠ خێزانی شاری كەركووكدا.