لە بەری ڕاست و چەپی نەینەوادا ٢٥٠٠ خێزان هاوکاری کران

مووسڵ-KDP.info-  دەزگای خێرخوازیی بارزانی هەڵمەتێکی بەرفراوانی هاوکارییەکانی بۆ هەردوو بەری ڕاست و چەپی نەیەنەوا لە کاتێکدا بەڕێوەبرد، کە هێشتا شەڕ لە کۆڵانەکانی بەشێک لە گەڕەکەکانی نەینەوادا بەردەوامە و تیمەکانی دەزگای خێرخوازیی بارزانی بێ گوێدان بە مەترسییەکان، بە هەماهەنگیی دەوڵەتی کوێت هاوکاریی خۆراکیان گەیاندە ٢٥٠٠ خێزان.

ئەمڕۆ ڕێکەوتی ٩/٥/٢٠١٧ تیمەکانی دەزگای خێرخوازیی بارزانی سەرەڕای بوونی شەڕ لە بەری ڕاستی نەینەوادا، بە هەماهەنگیی دەوڵەتی کوێت هاوکاریی خۆراکیان بۆ ٢٥٠٠ خێزانی شارەکە لە هەردوو بەری ڕاست و چەپ دابین کرد.

لە دەستپێکی مانگی پێنجەوە هەتا ئێستا هاوکاریی خۆراکی بۆ ٥٠٠٠ خێزانی ناو سەنتەری نەینەوا دابین کراوە، دانیشتووانی شاری نەینەوا بە هۆی شەڕ و ئاڵۆزییەکانەوە لە بارودۆخێکی خراپ دان و کەمترین پێداویستییە خۆراکییەکان لەو شارەدا دەست دەکەوێت و دەزگای خێرخوازیی بارزانی بەشێک لە پێداویستییەکانی ئەو خێزانانە پڕ دەکاتەوە.