١٢٧٣ خێزانی ئاوارە لە دیبەگە هاوکاری کران

دیبەگە-KDP.info-  دەزگای خێرخوازیی بارزانی بە هەماهەنگیی ڕێکخراوی مرۆیی ئومێدبەخش و وەزارەتی کۆچ و کۆچبەرانی عێراق لە دوو هەڵمەتی جیاوازدا هاوکاری بۆ ١٢٧٣ خێزانی ئاوارەی دیبەگە دابین کرد.

ئەمڕۆ، ڕێکەوتی ١٧ی نیسانی ٢٠١٧، دوو هەڵمەتی هاوکاری لە کەمپەکانی دیبەگەدا بەڕێوەچوون و ١٢٧٣ خێزان سوودمەند بوون. دەزگای خێرخوازیی بارزانی و ڕێکخراوی مرۆیی ئومێدبەخش جلوبەرگیان بۆ ١٠١٩ خێزانی ئاوارەی نیشتەجێی کەمپەکانی دیبەگە دابین کرد.

لە درێژەی کار و چالاکییەکانی ئەو ڕۆژەدا دەزگای خێرخوازیی بارزانی بە هەماهەنگیی وەزارەتی کۆچ و کۆچبەرانی عێراق پێداویستیی خاوێنکەرەوەی پێشکەشی ٢٥٤ خێزانی دیکە کرد.

کەمپەکانی دیبەگە بریتین لە (دیبەگەی یەک و دوو، دیبەگەی یاریگا) و، دەکەونە سنووری پارێزگای هەولێر و تایبەتن بە ئاوارەکانی نەینەوا و دەورووبەری. سەرجەم کەمپەکان لەلایەن (دەزگای خێرخوازیی بارزانی)یەوە بەڕێوە دەبرێن.