ده‌زگای خێرخوازیی بارزانی و مانگی سووری ئیمارات 7 تۆن ده‌رمانیان دا به‌ وه‌زاره‌تی ته‌ندروستی

هه‌ولێر-KDP.info-  ده‌زگای خێرخوازیی بارزانی به‌ هاوكاری له‌گه‌ڵ مانگی سووری ئیماراتدا 7 تۆن ده‌وا و ده‌رمان و پێداویستیی ته‌ندروستییان پێشكه‌شی وه‌زاره‌تی ته‌ندروستیی حكوومه‌تی هه‌رێمی كوردستان كرد.

 

دوێنێ 24/2/2016، دەزگای خێرخوازیی بارزانی به‌ هاوكاریی له‌گه‌ڵ مانگی سووری ئیماراتی و بە ئامادەبوونی د. ڕێكه‌وت حه‌مه‌ ڕه‌شید وه‌زیری ته‌ندروستی حكوومه‌تی هه‌رێمی كوردستان و نه‌وزاد هادی پارێزگاری هه‌ولێر و مووسا ئه‌حمه‌د جێگری سه‌رۆكی ده‌زگای خێرخوازیی بارزانی و شێخ ڕاشد سەركونسوڵی ئیماراتی عه‌ره‌بی له‌ هه‌ولێر، 7 تۆن له‌ داووده‌رمانیان پێشكەشی وه‌زاره‌تی ته‌ندروستی حكوومه‌تی هه‌رێمیان كرد، پێداویستیه‌كانیش بریتی بوو له‌ ده‌رمانی نه‌خۆشیی جگه‌ر و، پێكوته‌ی سوورێژه‌ی منداڵان و نه‌خۆشییه‌كانی دیكه‌ی منداڵان‌.

 

له‌وباره‌یه‌وه‌، د. ڕێكه‌وت حه‌مه‌ڕه‌شید وه‌زیری ته‌ندروستی حكوومه‌تی هه‌رێمی كوردستان بۆ كه‌ناڵه‌كانی ڕاگه‌یاندن گوتی: به‌ناوی حكوومه‌تی هه‌رێمی كوردستانه‌وه‌ زۆر سوپاسی مانگی سووری ئیماراتی و ده‌زگای خێرخوازیی بارزانی كرد له‌به‌رامبه‌ر پێشكه‌شی پێداویستی و كه‌ره‌سته‌ ته‌ندروستیه‌كان به‌ بنكه‌ ته‌ندروستیه‌كانی هه‌رێمی كوردستان، هه‌روه‌ها گوتی: ئه‌مڕۆ 7 تۆن ده‌رمان و پێداویستی ته‌ندروستیمان له‌ مانگی سووری ئیماراتی وه‌رگرت كه‌ سوودێكی زۆر باشی ده‌بێت بۆ كه‌رتی ته‌ندروستی و هیوای به‌رده‌وامی بۆ مانگی سووری ئیماراتی و ده‌زگای خێرخوازیی بارزانی ده‌كه‌ین، كه‌ له‌ كه‌مپی ئاواره‌ و په‌نابه‌ران هاوكاری و پێداویستی به‌رده‌وامیان ده‌كه‌ن.

 

 مووسا ئەحمەد جێگری سەرۆكی دەزگای خێرخوازیی بارزانییش ڕایگەیاند: "بە سوپاسه‌وه‌ بۆ مانگی سووری ئیماراتی كه‌ هاوبه‌شێكی سه‌ره‌كیمانن له‌ كۆمه‌ككردن و یارمه‌تیدانی لێقه‌وماو و په‌نابه‌رو ئاواره‌كان له‌ هه‌رێمی كوردستان، ئه‌مڕۆش به‌هاوبه‌شی له‌گه‌ڵ مانگی سووری ئیماراتی 7 تۆن له‌ داو و ده‌رمان و پێداویستی ته‌ندروستیمان به‌خشیه‌ وه‌زاره‌تی ته‌ندروستی حكوومه‌تی هه‌رێمی كوردستان."

 

 

سه‌باره‌ت به‌ كارو چالاكییه‌ به‌رده‌وامه‌كانی ده‌زگای خێرخوازیی بارزانی بۆ په‌نابه‌ر و ئاوارهی نیشتەجێی هه‌رێمی كوردستان، نه‌وزاد هادی پارێزگاری هه‌ولێر ڕایگه‌یاند: "زۆر سوپاسی ده‌زگای خێرخوازیی بارزانی ده‌كه‌ین كه‌ به‌رده‌وام هه‌وڵیداوه‌ هاوكاری و یارمه‌تی په‌نابه‌ر و ئاواره‌ی نیشتەجێی هه‌رێمی كوردستان بكات، ئێستاكه‌ بۆته‌ به‌هێزترین ده‌زگای خێرخوازیی له‌ هه‌رێمی كوردستان و ناوچه‌كه‌دا."