دەزگای بارزانی جانتا و پێداویستی خوێندنی بەسەر 567 قوتابیدا دابەش کرد

دهۆك -KDP.info-  دەزگای خێرخوازیی بارزانی لە کەمپی داودی و ناحیەی باعەدرێ جانتا و پێداویستی بەسەر 567 قوتابیی قۆناغی بنەڕەتیدا دابەش کرد.

ڕۆژی 25/10/2015 بە مەبەستی هاوکاریکردنی زیاتری قوتابیانی پەنابەر و ئاوارە لە سەرجەم کەمپەکانی هەرێمی کوردستان، دەزگای خێرخوازیی بارزانی ساڵانە جانتا و پێداویستی خوێندن بەسەر قوتابیاندا دابەش دەکات، لەو میانەشدا پرۆسەی دابەشکردنەکە تاوەکو ئێستا ژمارەیەک کەمپی گرتووەتەوە و، ئێستا لە کەمپی داودی، دەزگای خێرخوازیی بارزانی جانتا و پێداویستی جۆراوجۆری خوێندنی بەسەر (300) قونابی قۆناغی بنەڕەتی لە پۆلی (1 تا 6) ی کەمپی داودی دابەشکرد. هاوکات لە ناحیەی باعەدرێ لە پارێزگای دهۆک تیمێکی دەزگای خێرخوازیی بارزانی جانتا و پێداویستی خوێندنی بەسەر (267) قوتابی ئاوارەی ناحیەی باعەدرێی سەر بەقەزای شێخان دابەش کرد.
لەبارەی بەردەوامی پرۆسەی دابەشکردنی پێداویستیەکانی خوێندن بەسەر قوتابیانی پەنابەر و ئاوارە، مووسا ئەحمەد جێگری سەرۆکی دەزگای خێرخوازیی بارزانی ڕایگەیاند: "دەزگای خێرخوازیی بارزانی ساڵانە جانتا و پێداویستی خوێندن بەسەر قوتابیانی قۆناغی بنەڕەتی لەسەرجەم کەمپی پەنابەران و قوتابیانی دەرەوەی کەمپەکان دابەش دەکات." هاوکات ڕایگەیاند: "ئەمڕۆ لە کەمپی داودی و ناحیەی باعەدرێدا دابەشکردنەکە بەڕێوە چوو و تیایدا (567) قوتابی لە پێداویستیەکانی خوێندن سوودمەند بوون."