لەوێـــوە، بۆ هەموو لایەك دەرکەوت کە كورد نەک هەر دەتوانێ بەڵکو بڕواشی بەوە هەیە کە بە دید و کەرەستەی ستراتیژیی وەک (فیکر، ڕابەر، پارت، جەماوەر و شۆڕش)ەوە لە ژینگە و دۆخی جیاجیای ناوخۆیی و دەرەکیدا سیاسەت بکا و ئاراستەی ڕەتکردنەوەو نەهێشتنی چەوسانەوەو ژێردەستەیی نەتەوەیی و نیشتمانی کورد بکاتە ئامانجی نزیک و دوور. لەو ڕوانگەیەوە دامەزراندنی پارتی وەرچەرخانێکی فرە مەودا بوو، بە تایبـــەت لەو ڕووەوە کە ئیتر کوردایەتی لە کاردانەوەو کەف و کوڵی کورت خایەندا بەرامبەر بە زوڵم و ستەم کورت نەبێتەوە، بەڵکو بە جۆرێک بێ کە ڕابەر و پارت وەک بوونی ستراتیژی قۆناغبڕ ناوەند و جەوهەری خەبات بێ بۆ هەموو دۆخەکان.
هەر ئەمەش وایکرد پارتی لە جەرگەی بەرگری لە کۆماری کوردستان و لە هەل و مەرجی یەکجار سەختی پەڕینەوەی بارزانی نەمر لە ڕوباری ئاراس، بۆ سۆڤیەت و قۆناغی زاڵمانەی لە یەکدابڕاندنی نزیک بە یەک دەیەی سەرۆک بارزانی نەمر و پارتەکەی لە یەکتر و سەرەڕای ئەو هەموو توندوتیژی وئیرهابی دەوڵەتی پاشایەتی عیراق، پارتی لە دۆخی پەرەسەندن و فراوان بووندا وەک تاکە ئامرازە ستراتیژیەکە نەک هەر مایەوە؛ بەڵکو بەوپەڕی کاراییەوە خەبات و تێکۆشـــانەکانی کـــوردی لە هەموو بوارەکاندا جۆشدایەوەو سەرکردایەتی کرد.
-٢-
پارتی لە ماوەی دوور و درێژی خەباتیدا، بێجگە لە خەباتی فیکری و سیاسی و میدیایی نهێنیدا؛ بە بەرنامەوە، لەگەڵ هێزە سیاسیەکانی عیراق و لەگەڵ دەوڵەت و حکوومەتەکانی بەغدا و وڵاتانی دیكەیشدا، خەباتێکی سەخت و دژوار و بگرە ئاڵۆزی دپلۆماسیشی وەک شێوە و ستایلێک لە تێکۆشان کرد و لەو سۆنگەیەشدا ڕۆڵ و پێگەی خۆی لە ناو گۆڕانە سیاسی و هاوكێشەكاندا لە بەرژەوەندی نەتەوەی كورد بە ڕوونی
دەستنیشان كردووە.
پارتی بە “سیاسەت ـــ ستراتیج” ی هاوسەنگ و واقیعبین هەنگاوی ناوە، هەمیشە دوور بووە له هەڵپە و هەڵەشەیی و سەرەڕۆیی و پەڕگیری.
