دەزگەهێ خێرخوازی یێ بارزانی و شۆرەشەکا نووی
چیا حەمید شەریف*
پشتی ئەردهەژا ل باکوور و رۆژئاڤایێ کوردستانێ چێبووی، ئێکسەر سنوور دەربازکرن، دەزگەهێ خێرخوازی یێ بارزانی شیا دیرۆکێ بۆ دوزا رەوا یا مللەتێ کورد تۆمار بکت، هەر چەندە مللەتێ کورد ب رێیا شورەشیێن چەکدار چەندین شورەشێن مینا ئەیلول و گولان و شکاندنا تیرۆرستێن داعش تۆمار بکن، لێ یا ڤێ جارێ شورەشا هاریکاریێن مرۆڤی بوو، کارێ وان هەمی کورد شانازیێ پێ دبن.
دوهی پێشمەرگێ کوردستانێ د ناڤ ئاخا باکوورێ کوردستانێ ب چەکێ خوە ل هەوارا رۆژئاڤایێ کوردستانێ چوو، نەهێلا کۆبانێ بکەڤت دەست تیرۆرستاندا، ئەڤرۆ دووبارە خەلکێ باکوور و رۆژئاڤا ب رۆندک و کەیفخوەشی ڤە، پێشوازیێ ل دەزگەهێ خێرخوازیێ بارزانی دکن، ئەڤە ژی وێ ئێکێ نیشان ددت کەسێن دلسۆز ڤی دەزگەهی ب رێڤە دبن و بۆیە جهێ باوەریا خەلکێ هاریکاریێ خوە رادەستی ڤێ رێکخراوێ دکن، دزانن هاریکاریێن وان دگەهن جهێ مەرەم.
د نووکە دا دەزگەهێ خێرخوازی یا بارزانی چویە د ناڤ رێزێن رێکخراوێن نیڤدەولەتی دا، شیا ل پێشیا هەمی رێکخراوێن جیهانی خوە بگەهینت تورکیا و باکوور و رۆژئاڤایێ کوردستانێ، ڤێ ئێکێ ژی دەنگڤەدانەک مەزن د میدیا تورکیا و جیهانێ دا دروست کرن، بۆ هەمیا ئەشکەرە بوو، کو کورد چەند مرۆڤ دوستن و دەستێ هاریکاریی بۆ مرۆڤایەتی درێژ دکن.
دەزگەهێ خێرخوازی یێ بارزانی ب ڤان هاریکاریێن خوە، شیا وان کەسان پەشیمان بکت یێن دۆژمنداریا گەلێ کورد دکرن، ئەو پەیام ژی گەهاند کو کورد نە بتنێ د شەری دا ل دژی ستەمکاریێ یە، بەلکو د بوارێ مرۆڤایەتیی و خێرخوازی دا ژی نەتەوەکێ دلفرەهن و د ئاشتی خوازیێ دا ژی ل پێشیا خەلکێ دی نە.
لدووماهیێ دڤێت هەمی کورد ل هەر دەڤەرەکێ شانازیی پێ ببت و هەمی ئالیەک پشتەڤانیێ ل بکت.
*ئەندامێ پەرلەمانێ كوردستانێ
