کۆنگرێ دەولەتا جیهانی
ئحسان ئامێدی
ل ٢٠٢٢/٢/١٨ گەرا ٥٨ یا کونگرێ مونشن یێ ئاسایشا نێڤدەولەتی هاتە بەستن، ب ئامادەبوونا سەرۆک و وەزیر و بەرپرس و کاربەدەستێن جیهانێ.
ئەڤ کونفرانسە زورێ گرنگە چونکی سەرۆک و کاربەدەستێن بالا دەستێن وەلاتێن جیھانی تێدا پشکدار دبن و پەیامێن خو پێشکێش دکەن و ل پەراوێزا کونفرانسێ دیتن و دیدارێن گرنگێن تایبەت و نھێنی دناڤبەرا ئامادەبوویا چێدبن و رێکەفتن و ھەڤکاری و ھەماھەنگی دروست دبیت پێناڤی ئاسایش و بەرژەوەندێن گشتی دا.
کونفرانسێ مونشن یێ ئاسایشێ ئێک ژ مەزنترین و گرنگترین کونگرێن نێڤدەولەتیە سالانە ل باژێرێ مونشنێ ئەلمانی بو ماوێ سێ روژان دھێت بەستن تێدا سەروک و سەرکردێن مەزن و بڕیاربدەست و بسپور و ئەکادیمی د ھەمی بیاڤێن ئاسایشێ و سیاسی و لەشکەری دا باسێ ئاسایشێ و سیاسەت و بەرھنگاریێن وێ ل ئاستێ جیھانێ دکەن و بریارێن گرنگ ددەن.
کونگرێ ئاسایشێ ل مونشن ژبلی کارێن کارناما کونگرەی کو دێ لسەر تەڤایا پرسێن ئاسایشێ و قەیرانێن ئابووری و کێشێن مروڤی و گەف و مەترسیێن تیرورێ و گیروگرفتێن روسیا و ئوکراینا و قلپا ناتو و ئەمریکا و دوسیا ئەتومیا ئیرانێ و پەتایا کورونا و قەیرانێن سەقای و وزێ و گرفتێن دی یێن رۆژھەلاتا ناڤێن و ئەفریقیا و ئارێشێن ئاوارە و پەنابەران و کێشێن دی یێن جیهانی ئاخڤن، دێ لایەنێن ھەڤکار و ھەڤدژ ژی ئامادەدبن و دەرفەتەکا دی یا دبلوماسیەتا پشت دەرگەھێن گرتی و پشت کەوالیسانە کو ھەمان گرنگی ھەیە کو بڤێ رێ دەرفەتێن نوی بۆ دیالوگ و دانوستاندن و لێکتێگەھشتنێ و ھەماھەنگیێ و ھەڤکاریێ ڤەدبن.
لڤی کونگرەی کو جێگرا سەروکێ وەلاتێن ئێكگرتیێن ئەمریکا و ئەمیندارێ گشتی یێ نەتەوەیێن ئێکگرتی و سەرۆکا کومسیونا ئەوروپا و ئەمیندارێ قلپا ناتو و سەرۆکێ ئوکراینا و چەندین سەرۆک و کاربدەستێن دی یێن جیهانی ئامادەبووینە، روسیا ئامادەنەبوویە!.
ب خوشحالیڤە لڤی کونگرەی نوینەرێن کوردستانێ بەرێز نێچیرڤان بارزانی سەرۆکێ هەرێما کوردستانێ و بەرێز مەسرور بارزانی سەروکێ حکومەتا هەرێما کوردستانێ ئامادەبووینە، داکو پەیاما هەرێما کوردستانێ بگەهینن و پەیوەندیێن هەرێمێ و جیهانێ خورتکەن، وەکو هاتیە دیتن هەردوو بەرێزان زێدەباری پشکداریکرنێ د رونشتن و دانوستاندنێن کونگرەی دا، چەندین دیدار و کومبون دگەل بەرپرسن مەزنێن جیهانێ کرن، ئەڤ پەیوەندی و دانوستاندنە دێ پێگیریەکا سیاسی و ئەخلاقی دروستکەت بۆ پشتەڤانیا مافێن هەرێما کوردستانێ و پرۆسا سیاسی ل ئیراقێ.
ئەڤ کونگرە یێ کۆمبەستا دەولەتا جیهانیە، کەسانێن دەستهەلاتدار و بهێز یێن د شێن کارتێکرنێ بکەن بو دابینکرنا ئاسایشێ و سەقامگیریێ ل ئاستێ هەرێم و دەولەت و جیهانێ دا ئامادەدبن، و چەند باشە سەرۆکێن کوردستانێ گەهشتینە ڤی ئاستی کو ل ئاستێ جیهانێ حساب بۆ بهێتەکرن و سەرەدەری دگەلدا بهێتەکرن و پشکداربن د رەسما سیاسەتا ئاسایشا نیڤدەولەتی دا.
هەبوونا کوردستانی لڤی ئاستی ل کوربەندێن جیهانی پشتگەرمیەکە کو هەرێما کوردستانێ جهێ خو ل نەخشێ جوگرافی و سیاسی و ئاسایشا جیهانی دا کریە و پێگیریێن خو هەنە.
چەندین کۆمبەستێن جیهانی هەنە کارێ خو وەکو دامەزراوێن دەولەتا جیهانی برێڤە دبەن وەکو رێکخراوا نەتەوەیێن ئێکگرتی و جڤاتا ئاسایشا نیڤدەولەتی و رێکخراوێن نێڤدەولەتی و کوربەندێ ئابووریێ داڤوس و کونگرێ مونشنێ ئاسایشێ و …هتد.
کورد ب خەبات و قوربانیدانا شیاینە خو بگەهیننە هندەکا ژڤانا و ئەندامەتیا وانا وەرگرن و ب تایبەتی کوربەندێ داڤوس یێ ئابووریێ و کونگرێ مونشن یێ ئاسایشێ، و ئەڤ هەردوو دامەزراوە یێن نێڤدەولەتی و جیهانی نە و رۆلێ خو یێ کارا هەیە بۆ سیاسەتا ئابووریا جیهانی و ئاسایشا جیهانی کو ستونێن سەرەکی نە بۆ ئاسایشا نەتەوەیا جیهانی.
لڤێرە دێ بێژم ئەو داگیرکەر و ستەمکارێن نەهێلن کوردستان ببیتە دەولەتەک سەربخو، دڤێت بزانن ئەڤرۆ کورد پشکدارن د دامەزراوێن دەولەتا جیهانی دا، و رۆژ بو رۆژێ دێ دۆزا وێ گەشەکەت و خو سەپینیت.
دەست ل ناڤ دەستی بۆ پشتەڤانیا ڤان سەرۆکا یێ ژ پێشمەرگەیاتیێ گەهشتینە دەستهەلاتداریێ ل کوردستانێ و بەرەف دەولەتا جیهانی ڤە برین.
