ل بیره‌وه‌ریا ریفراندۆما سه‌ربه‌خۆیی یێ
په‌رله‌مانتار: ژیان طاهر زێوه‌ی
ئێك ژ وان خه‌سله‌تێن نه‌په‌سه‌ندكری یێن كو كه‌ساتیا مرۆڤان لاواز نیشادده‌ت ئه‌وه كو گۆتن و كریارێن مروڤی هه‌ڤدژی ئێك بن. "دبێژیت، به‌س ناپێژیت" گۆتنه‌كا كورده‌واریه كو گه‌له‌ك جاران خه‌لكێ مه بكار دئینن بۆ پێناسه‌كرنا وان كه‌سێن ئه‌ڤ خه‌سله‌ته لده‌ف هه‌ی و رامان ژ وێ گۆتنێ ئه‌وه كو باوه‌ریا خو ب وی كه‌سی نه‌ئینن چنكو نه مروڤێ كریارێ یه. ئه‌ڤ خه‌سله‌ته دێ پتر یا نه‌شرین و نه‌په‌سه‌ندكری بیت ئه‌گه‌ر لده‌ف كه‌ساتیێن ناڤدار، یان سه‌رۆك و رێبه‌رێن گرووپان، یان سه‌ركرده‌یێن نه‌ته‌وه‌كی، یانژی وان كه‌سان بیت یێن كو ملله‌ت بچاڤێ رێبه‌ر و رێنیشانده‌ر سه‌ره‌ده‌ریێ دگه‌ل دكه‌ت. هه‌بوونا ڤێ خه‌سله‌تێ لده‌ف رێبه‌ر و كه‌ساتیان دبیته ئه‌گه‌رێ هندێ كو سه‌نگ و بهایێ وان لده‌ف ملله‌تێ وان كێم بیت.
به‌روڤاژی ڤێ چه‌ندێ ئه‌و كه‌ساتیێن كو لئاستێ گۆتنێن خو پێنگاڤان دهاڤێژن هه‌رده‌م جهێ رێزێ بووینه دناڤ گه‌لێ خۆدا و وه‌ك هێمایه‌كێ سه‌ركه‌فتنێ و باوه‌ریێ سه‌ره‌ده‌ری دگه‌ل هاتیه كرن. بتایبه‌ت ئه‌گه‌ر ئه‌و كه‌ساتی لئاستێ سه‌روك و رێبه‌رێن ملله‌ته‌كی بن، دێ هه‌رده‌م ڤیان و باوه‌ریا ملله‌تی بۆ وان زێده‌تر لێ هێت و د هه‌می پێنگاڤ و بڕیاراندا دێ پشته‌ڤانێن وان بن و ئه‌و سه‌روكێن هێزا خۆ ژ باوه‌ریا ملله‌تێ خۆ وه‌ردگرن هه‌رده‌م كه‌ساتیێن سه‌ركه‌فتی بووینه. سه‌روك بارزانی ئێك ژ وان كه‌ساتیانه یێن كو خه‌باتا وی و بیرو باوه‌رێن وی د هه‌می ژیانا وی دا هه‌ڤكێشێن ئێك بوون و چ ئاسته‌نگ و چ بیرو باوه‌رێن دژ نه‌شیاینه حه‌زا وی و بزاڤێن وی بۆ وێ ئارمانجا كو هه‌می ژیانا خو حه‌تا نهو بۆ ته‌رخان كری لاواز بكه‌ن، كو ئه‌وژی سه‌ربه‌خویی یا خه‌لكێ كوردستانێ یه. سه‌رۆك بارزانی بدرێژاهیا ژیانا خو شیایه وێ باوه‌ریا توندا دناڤبه‌را خۆ و گه‌لێ خۆ دا درست بكه‌ت. بڕیارا ئه‌نجامدانا ریفراندۆما سه‌ربه‌خۆیی یێ كو یا هه‌ڤدژ بوو دگه‌ل پیلان و سیاسه‌تێن ده‌وله‌تان و بهه‌می ره‌نگان چ لئاستێ ناڤخویی و چ لئاستێ جیهانی هه‌ولێن رێگریكرنێ دهاتنه ئه‌نجامدان، ب رێبه‌راتی و سه‌ركێشیا جه‌نابێ وی سه‌لمێنه‌را ڤێ راستیێ یه كو جه‌نابێ سه‌رۆك بارزانی كه‌ساتیه‌كێ كاریزما و باوه‌رپێكری و سه‌ربلنده دناڤ گه‌لێ خو دا و نه ژوان كه‌سانه یێ كو خۆ شه‌رمزاری ملله‌تێ خۆ بكه‌ت.
بڤێ هه‌لكه‌فتا پیرۆز سه‌رێ رێز و نه‌وازشێ دچه‌مینین بۆ هه‌می وان نیشتمانپه‌روه‌ر و نیشتماندوستێن كو بزاڤێ دكه‌ن ژ بۆ بده‌ستڤه ئینانا مافێن ره‌وایێن گه‌لێ مه. سلاڤ لسه‌ر گیانێ پاكێ ته‌ڤایا شه‌هیدێن رێیا ئازادیێ و سه‌ركاروانێ وان بارزانی نه‌مر.
سه‌ربلندم كو ریفراندومچیمه.
