ل یادا 38 ساڵیا ئەنفالكرنا بارزانییان دا
ئاشتى كوچه‌ر*
ژبه‌رى 38 سالان و درۆژه‌كا وه‌كى ئه‌ڤرۆ دا، رژێما به‌عسا ژناڤچۆى مه‌زنترین تاوان دژى گه‌لێ كورد و بارزانییان ئه‌نجامدا، ئه‌و تاوانه هه‌رده‌م خاله‌كا ره‌شه ب رویێ دوژمنان ڤه كو (هه‌شت هزار) گه‌نج و لاو پیر و زارۆكێن بارزانییان بێ جوداهییا ته‌مه‌نى، ب ساخینى ل بیابانێن باشورێ عیراقێ بن ئاخ كرن، لڤێرێ گیانێ شه‌هیدان به‌هەشت و ئارام بیت و نه‌ڤه‌شارتیه و به‌رچاڤه، نه ب ئه‌نفالێن بارزان و به‌هدینان و نه‌یێن گه‌رمیان، نه ب سۆتنا گوندان و وێرانكرنا باژێران و راگوهاستن و قڕكرنێ، گه‌لێ كوردستانێ ده‌ستان ناداهێلت، د ڤى سه‌ده‌یێ دا ژى ب شێوازه‌كێ دى ژبه‌رى حه‌فت سالان، ئه‌نفال ل شنگالێ ژى هاته ئه‌نجامدان و قڕكرن و ڤه‌گوهاستن و بن ئاخ كرن و برنا كچ و كوڕێن ئێزدییان و داگیركرنا كه‌ركوكێ و ڤه‌گوهاستنا كوردان ل سه‌ر جهومالێن وان، به‌لگه‌یه‌كا دى یه كو نه‌یارێن كوردستانێ هه‌ر به‌رده‌وامن و هه‌مان هزرا گه‌نى یا ژ به‌رى سه‌دان ساله دسه‌رێ وان دایه، هندى دوژمنان ئه‌ڤ مێژوویا ره‌ش هه‌بیتن دێ گه‌لێ مه خوه‌ڕاگرتر و ئێكگرتى تر بیتن، ژبه‌ركو بباشى دزانین دوژمن جوداهیێ نائێخیته دناڤبه‌را (بارزان و شنگال و كه‌ركوك و گه‌رمیان و حه‌له‌بچه و ته‌ڤایا ده‌ڤه‌رێن كوردستانێ دا) لێ هه‌رده‌م گه‌لێ مه رابوویه سه‌رپیان لێ دوژمنان چوك دانایه و قركا وان ب په‌تێ سێدارێ ب ئه‌نجام گه‌هشتیه.
*بەرپرسێ لقێ 17 شنگال
