د بیر ئینانا (32) سالیا ئەنفالێن بەھدینان دا
عبدالعزیز محسن بارزانی
دیارە پشتی ھەشت سالێن شەری دناڤبەرا عێراقا عەرەبی و ئیرانا فارسی دا، و کوشتنا زێدەتری ئێک ملیۆن مرۆڤ، سەدام حسێنێ گۆڕ بە گۆڕ و دارودەستێن وان تێر خوین نە ببوون، جارەکا دی گەلەک ب ھۆڤانە دژی گەلێ کوردستانێ ئەنفال و کیمیابارانکرن و گوند خرابکرن و تالانکرنا گەلێ کورد دەست پێکرن.
رژێما ژناڤچۆیا بەعسیان ب ھەشت قۆناغان «١٨٢» ھزار کەسێن کورد ل گەرمیان و سورداش و قەرەداغ و ھەلەبجە و خۆشناوەتی و بادینان ئەنفال و جینوساید و بێ سەروشوینکرن.
د ڤێ شالاوا درندەدا زەلام و ئافرەت ژێک جودا کرن و گەلەک ل ئافرەتان فروتنە دەولەتێن عەرەبی. ل وی دەمی دا جیھان بێ وژدان ما، کەس نەبو رێگریێ ل ڤێ رژێما درندانە بكەت.
دچەند خولەکەکان دا ٥٠٠٠ ھزار کەس ل ھەلەبجە کیمیابارانکرن، ٤٥٠٠ گوندێن کوردستانێ خرابکرن، مزگەفت و کەنیسە پێکڤە خرابکرن و پەرێن قورئانێ و ئینجیلی پێکڤە سوتن.
ئەڤ پرۆسە قوناغ بۆ قوناغێ و دەڤەر بۆ دەڤەرێ تاکو قۆناغا ھەشتێ گەھشتیە دەڤەرا بەھدینان. ئانکو ل رێکەفتی (25-8-تاکو-6-9—1988)
ئەوێن برین برن، ئەوێن مایی دورپێچکرن و برنە نێزیکێ ھەولێرێ ل بەحرکێ و جێژنیکان ئاکنجیکرن و ھندەک ژ خەلکێ شەرەفمەندێ ھەولێرێ خۆ ل وی خەلکی کرنە خودان، داکو ل وێ دەشتێ ژ برسان نەمرن، بەلێ جھێ مخابنیێ یە ئەڤە ھەڤدە سال ب سەر ئازادیا عیراقێ ڤە چۆن، ھێشتا روفاتێن وی خەلکێ ئەنفالکری نەھاتینە زڤراندن کو جھێن وان ل بیابانێن عێراقا فاشل ھاتینە دیتن.
ھێشتا ل دەڤەرا بەھدینان جھەک یان گورستانەک، یان مینومێنتەک بۆ نەھاتینە دروستکرن. یان ھێشتا کەس و کارێن وان نە ھاتینە قەرەبوکرن. یان ھێشتا ئەڤ کەیسە نەبویە کەیسەکا نێڤ دەولەتی.
ژبەر ھندێ ژی داخوازێ دکەین حکومەت و پەرلەمانێ کوردستانێ و حکومەت و پەرلەمانێ عێراقا فیدرال گەلەک ب جدی کار ل سەر ڤێ کەیسێ بکەن. یاسایێن تایبەت بۆ دەربکەڤن بۆ ھندێ زێدەتر گرنگی ب کەس و کارێن وان بھێتە دان.
ئەڤ تاوانا ھندا مەزن ئەوا دژی ھەموو بنەمایێن مرۆڤایەتیێ و رێكکەفتنێن مافێن مرۆڤی و جارناما جیھانیا مافێن مرۆڤی و دژی ھەموو رێكکەفتنێن نێڤ دەولەتی دێ مینیت خالەکا رەش ب ناڤ چاڤێن بکەرو دۆژمنێن مرۆڤایەتی و گەلێ کوردستانێ.
بۆ ھندێ ئەڤ تاوانا ھندا مەزن چجاران بەرزە نەبیت ھیڤیدارین د پرۆگرامێن خواندنێ دا بۆ ھەموو قۆناغان بھێتە خواندن داکو جیل بۆ جیلی بزانن کانێ چ تاوان ب سەرێ گەلێ کوردستانێ ھاتیە.
ھیڤیدارین ئەڤ بیر ئانینە ببیتە ھێڤێنێ ئێکرێزیا ھەموو لایەنێن سیاسی ل ھەرێما کوردستانێ بۆ داکوکیکرنێ ل مافێن رەوایێن شەھیدو جینوسایدو ئەنفال و زیندانیێن سیاسی.
ھیڤیدارین دسالا بھێت دا لبن سێبەرا ئالایێ دەولەتا کوردستانێ روفاتێن ئەنفالکریان بھێنە زڤراندن بۆ ھەمبێزا ئاخا پیرۆزا کوردستانێ.
