ستراتیژ و ئایدیۆلۆژیا پارتی، گه‌ل كریه سه‌رۆكانیا هێزا وێ
ژیان طاهر زێوه‌ی
ره‌گه‌زپه‌رستی، نه‌دادپه‌روه‌ری، زولم و زورداری، یان ژی گه‌له‌ك جاران حه‌زا بده‌ستڤه‌ئینانا ده‌ستهه‌لاتێ ژ ئه‌گه‌رێن سه‌ركییێن په‌یدابوون و درستبوونا پارتێن سیاسی و سه‌رهلدان و شورەشانن د ناڤ هه‌ر ملله‌ته‌كیدا. د دیروکا مروڤایه‌تیێدا دگه‌ل پێشكه‌فتن و شارستانیه‌تێ به‌رده‌وام بزاڤ و پێكول ژ بو بده‌ستڤه‌ئینانا ئازادی ودادپه‌روه‌ریێ هاتینه كرن. ب سه‌دان شورەش و سه‌رهلدان ژ ئالیێ گرووپ یان پارتێن سیاسی ڤە ژ بو دەستەبەرکرنا مافێن سیاسی، جڤاكی، ئابووری و چاندی هاتینه كرن.
هه‌رده‌مێ ئارمانج ژ درستبوون و لڤینێن پارتێن سیاسی و شوڕشان درستكرنا كه‌ناله‌كێ په‌یوه‌ندیێ دناڤبه‌را ده‌ستهه‌لاتێ و ملله‌تیدا ژبو پڕكرنا ڤالاتیا دناڤبه‌را جڤاكی و ده‌ستهه‌لاتێدا بوویە، هندی كو ئه‌و بزاڤ د دوومدرێژ و ب زه‌حمه‌ت و ب قوربانیدانه‌كا زۆر ژی بووینه، ل دوماهیێ سه‌ركه‌فتن هەر بەهرا وان بوویه. شوڕشا نێلسون ماندێلای دژی ئاپارتایتێ ئانكو ره‌گه‌زپه‌رستیێ ل ئه‌فریقیا باشور، و بزاڤا مهاتما گاندی دژی ئمپراتوریا بریتانی ژ نموونێن هه‌ری زیندی و سه‌ركه‌فتینه كو بووینه قووتابخانه و هێمایێن ئازادیخوازان ل جیهانێ.
به‌روڤاژی وێ چەندێ، ده‌مێ كو مه‌ره‌م ژ بزاڤ و چالاكیێن سیاسی و درستكرنا گرووپ و پارتان بده‌ستڤه‌ئینانا ده‌ستهه‌لاتێ و هێزێ ژ بو بەرژەوەندیێن کەسوکی یان بەرتەنگ بیت، هندی كو یا ب به‌رهه‌م و ئه‌نجام ژی بیت، ل دوماهیێ رویێ راستیێ بۆ ملله‌تی دیار دبیت و شكه‌ستنا سیاسی دبیتە دوماهیكا وێ. گه‌له‌ك پارت و لایه‌نێن سیاسی ب ڤی ئاوایی ل جیهانێ ب گشتی و ل هه‌رێما كوردستانێ ب تایبه‌تی هاتینه د گوڕه‌پانا سیاسیدا.
پارتا دیموكراتا كوردستانێ ب رێبه‌ریا مستەفا بارزانیێ نەمر کو كه‌ساتیه‌كێ ب كاریزما و نیشتمانپه‌روه‌ر بوو ل ١٦ ته‌باخا ١٩٤٦ێ هاته دامه‌زراندن. بارزانی هه‌می خوشیێن ژیانا خو پێخمه‌ت خوشی و سەربەستی و ئازادیێ ژ بو هەمی تاكێن كوردستانی دانه لایه‌كی. پارتی هه‌ر ژ ده‌ستپێكا دامەزراندنا خو بڕیار دا خه‌باتێ ژ بو رزگاری و سه‌رفه‌رازیا گه‌لێ كوردستانێ، ژ بو دیموکراسیێ و دادپه‌روه‌ری و یه‌كسانیا جڤاکی بكه‌ت. پارتی ب درێژاهیا حەفتێ و چار سالێن بزاڤا رزگاریخوازا خو ژ بو ئاڤاكرنا جڤاكه‌كێ شارستانی و پاراستنا مافێ هه‌ر تاكه‌كێ كوردستانی بێی جیاوازیا ئولی، نه‌ته‌وەیی و ره‌گه‌زی هه‌وڵ دایه. كرێكار، جوتیار، زانا، بسپور، نڤیسكار، هزرڤان، ئافره‌ت، قوتابی، لاو، موسلمان، كریستیا‌ن، ئێزدی، شه‌به‌ك، كاكه‌یی، توركمان و هه‌می پێکهاتێن ئۆلی و نەتەوەیی ژبۆ دەستەبەركرن و پاراستنا مافێن خو یێن رەوا، خو د بازنه‌یا سیاسه‌ت و ستراتیژیا پارتیدا دیتیە و دبینن. ئه‌ڤ حزبە پشتی هه‌ر شكه‌ستنه‌كێ ب هێزه‌كا خورتتر و ب باوه‌ریه‌كا موکومتر ڕابوویە سەر پێ و چرایێ خه‌باتێ هێلایه هه‌ل و شوڕشه‌كا ئاگرینتر ڤه‌ژاندیه. زیندان، ئه‌شكه‌نجه، توپباران، ئه‌نفال، كیمیاباران، ده‌ربده‌ری، ئاواره‌یی و ته‌عریب نه‌شیاینه ئیرادا وێ یا پیلایین بشکێنن یان لاواز بكه‌ن یان باوه‌ریا ملله‌تی ل هه‌مبه‌ر وێ ژ ناڤ ببه‌ن. نها ژی د سەر هه‌بوونا گەلەک پیلانێن تێكده‌رانه‌یێن ناڤخوویی و ده‌ره‌كیێن هه‌ڤرك و نەیارێن دۆزا ره‌وایا گه‌لێ كورد را ژ بۆ لاوازكرن و ژناڤبرنا هێز و پێگه‌هێ پارتی، ئه‌ڤێ حزبێ ب ئیمانه‌كا مه‌زنتر و ب هێزه‌كا خورتتر ل بەر خو دایە و ژ بۆ پاراستنا ماف و ده‌ستكه‌فتیێن كو ژ ئه‌نجامێ خه‌باته‌كا مێژوویی بده‌ستڤه هاتینە هەول ددەت و بزاڤێ ژ بو نێڤنه‌ته‌وەیی كرنا پرسا سیاسیا گه‌لێ كوردستانێ و درستكرنا ئاشتی و هه‌ڤده‌نگیا نیشتمانی دکەت.
بێ گومان شكه‌ستنا هه‌ول و بزاڤێن نه‌یارێن پارتی ژ بۆ لاوازكرنا پێگه‌هێ وێ و ژناڤبرنا باوه‌ریا ملله‌تی ب وێ ژ ئه‌نجامێ وی بناخێ سیاسی و ستراتیژیێ بهێزه كو ئه‌ڤ پارته لسه‌ر هاتیە ئاڤاكرن، كو ئه‌و ژی ئارمانجێن نه‌ته‌وەیی و نیشتمانیێن گه‌لێ كوردستانێنه. ژ بو ڤێ چه‌ندێ ژی پارتی هه‌می كادر و ئه‌ندام و لایه‌نگرێن خۆ ب هه‌مان رێباز و ب هه‌مان باوه‌را خو گوریكرنێ په‌روه‌رده كرینه و دکەت و چ جاران سازش لسه‌ر مافێن گه‌لێ كورد نه‌كریه و ناکەت و هه‌رده‌م هه‌وڵ ددەت پێنگاڤان ژ بو پاشه‌رۆژه‌كا گه‌شتر بهاڤێژیت. له‌وما هه‌رده‌م گه‌ل پشته‌ڤان و سه‌رۆكانیا هێزا پارتی بوویه.
ب ڤێ هەلکەفتا پیروز، رێز و سلاڤان بۆ گیانێ پاكێ ته‌ڤایا شه‌هیدێن رێیا ئازادیێ و سه‌ركاروانێ وان بارزانی نه‌مر و ئدریسێ هه‌رده‌م ساخ دهنێرین. سلاڤ و رێز بۆ هه‌می كادر و ئه‌ندام و لایه‌نگرێن پارتی دیموكراتی كوردستان و پێشمه‌رگێن قاره‌مان كو هه‌رده‌م سینگێ خۆ كریه قه‌لغانا پاراستن و بسه‌رئێخستنا ئه‌زموونا كوردستانێ.
