نەتەوە یەكگرتووەكان: قارەمانیەتی و میهرەبانیی گەلی كورد، لە مەیدانی جەنگدا سەلمێنرا

هەولێر-KDP.info- بەرپرسی نوێنەرایەتیی نەتەوە یەكگرتووەكان لە هەرێمی كوردستان، لە دیداریدا لەگەڵ بەرپرسی پەیوەندییەكانی دەرەوەی پارتی دیموكراتی كوردستان ڕایگەیاند، ئێمە زۆر باش لە نەهامەتییەكانی كوردستان دەگەین و درك بەو ئەركە قورسە دەكەین كە لەسەر شانی گەلی كوردستان و حكوومەتی هەرێمی كوردستانە. داوایشمان لە نەتەوە یەگرتووەكان و ئەندامانی نێو ئەو رێكخراوە كردووە كە هاوكارییەكانیان بۆ هەرێمی كوردستان زیاد بكەن.

 

(هێمن هەورامی)، ئەندامی ئەنجوومەنی سەركردایەتیی پارتی دیموكراتی كوردستان و بەرپرسی پەیوەندییەكانی دەرەوە، پێشوازی لە (سۆكۆڵ كۆندی) بەرپرسی نوێنەرایەتیی نەتەوە یەكگرتووەكان لە هەرێمی كوردستان كرد.

(هێمن هەورامی) سەرەتا خۆشحاڵیی خۆی بۆ سەردانی نوێنەری نەتەوە یەكگرتووەكان و (سۆكۆڵ كوندی) بەرپرسی (یونامی) لە هەرێمی كوردستان  دەڕبڕی، هەروەها  سوپاسی  نوێنەرایەتیی نەتەوە یەكگرتووەكانی كرد لە هەرێمی كوردستان بۆ ئەو ڕۆڵە ئەرێنیانەی كە بۆ هاوكاریكردنی مرۆیی و لۆجیستیی حكوومەت و گەلی كوردستان لە سەرەتای نەوەدەكانی سەدەی رابردوو بە گشتی و بە تایبەتی لە دوای دروستبوونی ئەم قەیرانانەی ئێستای روژهەڵاتی ناوەڕاست و هاتنی تیرۆریستانی داعش و داگیركردنی مووسڵ، كە بووەتە هۆكاری ئاوارەبوونی خەڵكێكی زۆر لە سووریا و عێراق كە ئێستا لە هەرێمی كوردستان نیشتەجێن.

لە بەشێكی دیكەی دانیشتنەكەدا، بەرپرسی پەیوەندییەكانی دەرەوەی پارتی، دواپێشهاتەكانی هەرێمی كوردستان و ناوچەكەی بۆ نوێنەری نەتەوە یەكگرتووەكان خستە ڕوو و گوتی، كێشەكانی ڕۆژهەڵاتی نێوەڕاست و تەشەنەكردنیان خەتەرێكی جیدییە و پێگەی كورد لە بەگژداچوونەوەی ئەم كێشانە ڕۆڵێكی ئەرێنییە.

(هەورامی) سەبارەت بەو بلۆكبەندی و ئەو كێشانەی كە لە ناوچەكەدا هەن ڕایگەیاند كە، پارتی دیموكراتی كوردستان وەكو گەورەترین هێزی سیاسیی هەرێمی كوردستان ڕێگە نادات هەرێمەكەی و گەلی كوردستان ببنە بەشێك لەو كێشە و ئاڵۆزیانە.

بەشێكی دیكەی قسەكانی (هەورامی) باسكردن بوو لە ڕەوشی  نێوخۆی هەرێمی كوردستان و ئەو دیدارانەی سەرۆك (مەسعوود بارزانی) كە لەگەڵ لایەنە سیاسییەكاندا ئەنجامیان دەدات لە چەند رۆژی داهاتوودا بە مەبەستی دۆزینەوەی رێگاچارەیەك بۆ چارەكردنی كێشە سیاسی و ئابورییەكانی هەرێمی كوردستان.

هەروەها باس لەو پێشنیازانە كرا كە جەنابی سەرۆك خستوونیەتە بەردەم لایەنەكان بۆ ئەوەی بگەنە رێككەوتنێك لەسەر پرسی سەرۆكایەتیی هەرێم.

(سۆكۆڵ كۆندی)، بە ناوی نەتەوەیە یەكگرتووەكانەوە سوپاسی گەل و هەرێمی كوردستانی كرد كە بە ڕاستی لە مەیداندا سەلماندیان كە نەتەوەیەكی قارەمان و میهرەبانن و گوتی: "ئێمە زۆر باش لە نەهامەتییەكانی كوردستان دەگەین و درك بەو ئەركە قورسە دەكەین كە لەسەر شانی گەلی كوردستان و حكوومەتی هەرێمی كوردستانە. داوایشمان لە نەتەوە یەگرتووەكان و  ئەندامانی نێو ئەو رێكخراوە كردووە كە هاوكارییەكانیان بۆ هەرێمی كوردستان زیاد بكەن".

هەروەها (كۆندی) ئەوەیشی دركاند كە، ئەمڕۆ هەرێمی كوردستان بە نوێنەرایەتیی جیهان شەڕی تیرۆرستان دەكات، خوێن دەبەخشێت و خاك و ماڵ خۆی بۆ دوو ملیۆن ئاوارە كردووەتەوە لە بەرامبەر ئەمەدا جیهان دەبێت سوپاس و پێزانینی خۆی بە راستی پیشان بدات. ناكرێت قورسایی شەڕێكی گەورەی ئاوا لەسەر شانی هەرێم و گەلی كوردستان بێت.