بهەلکەفتا سالڤەگەرا تاوانا ئه‌نفالكرنا بارزانیان لقێ 18به‌یاننامه‌ك ده‌رخست
بهه‌لكه‌فتا بیره‌وه‌ریا سالڤه‌گه‌را ئه‌نفالكرنا (8000) هه‌شت هزار بارزانیان، سه‌رێ رێزو رومه‌تێ بو شه‌هیدێن ڤێ كاره‌ساتێ و سه‌رجه‌م شه‌هیدێن بزاڤا ئازادیخوازا گه‌لێ كوردستانێ دچه‌مینین و سلاڤان دهنێرین بو مالباتێن وان ئه‌وێن كه‌فتینه به‌ر كه‌رب و كینا بێ ره‌حمانه یا له‌شكه‌رێ رژێما گور به گورا (به‌عسییا).
به‌رى(31) سالان ل سپێده‌هیا روژا(31/7/1983)ێ له‌شكه‌رێ رژێما(سەدام)ى چار ده‌ورێن كومه‌لگه‌هێن (قوشته‌په ، به‌حركێ ، حه‌ریر و دیانا) دور پێچكرن و(8000)هاولاتیێن سڤیل و بێ گونه‌هـ دسه‌ر ژیێ (12) دوازده سالیێ دا ده‌سته سه‌ركرن و راپێچى بیابانێن عه‌ره‌بى ل ژێریا عیراقێ كرن و هه‌مى بساخى ژناڤ برن و بن ئاخ كرن و نوكه‌ژى ده‌م بو ده‌مى هه‌ستیكێن وان دگورستانێن بكوم دا دهێنه دیتن.
بێ گومان ئه‌ڤ تاوانه دهێته هژمارتن ئێك ژ مه‌زنترین تاوانێن درندانه ئه‌وێن ده‌رحه‌قێ گه‌لێ كوردستانێ هاتینه ئه‌نجام دان دچاخێ بوریدا ، له‌وما دخازین تاوانبارێن ڤێ تاوانێ ژ دادگه‌هان قورتال نه‌بن و بگه‌هنه سزایێ خو یێ عادیلانه و كه‌س و كارێن قوربانیان ژى بهێنه قه‌ره‌بوو كرن.
لقێ 18 یێ
پارتی دیموکراتی کوردستان
27/7/2014
