لە ساڵیادی شۆڕشی گوڵاندا، سیمینارێك بۆ قوتابیانی خولی 19ـی ئەکادیمیای پارتی ڕێك خرا
لە 38ـەمین ساڵیادی شۆڕشی پێشكەوتنخوازی گوڵاندا، سمینارێک بۆ قوتابیانی خولی 19ـی ئەکادیمیای پارتی لە بارەگای لقی دوو رێک خرا.
لە سمینارەکەدا كە بەرپرسی لقی دوو، عەلی حوسێن و ئەندامی سەرکردایەتی و بەرێوەبەری ئەکادیمیای پارتی، قادر قەچاخ و کارگێرانی لق و مامۆستایان ئامادەی بوون، بەرپرسی لق ئاماژەی بە هەڵگیرسانەوەی شۆڕشی گوڵان وەک زەرورەتێک و درێژەپێدەری شۆڕشی ئەیلوول کرد، کە بووە تەحەددایەک بۆ نسكۆی 1975 کە بە پلانێكی نێودەوڵەتی بەسەر گەلی کورد و شۆڕشەکەیاندا سەپاند.
بەرپرسی لق هاوکات گوتی، هەڵگیرسانەوەی شۆڕشی گوڵان هێز و توانا و ئومێدێکی گەورەی بۆ خەڵکی کوردستان گەڕاندەوە و خەباتی نەپساوە و کێشە رەواکەی گەلی کوردستانیشی لە قۆناخی شۆڕش و شاخ، گواستەوە بۆ حوکمڕانیی کوردی لە هەرێمی کوردستان و پێکهێنانی پەرلەمان و حکوومەت و دەستکەوتی گەورەی بۆ گەلی کوردستان بەدی هێنا.
عەلی حوسێن لەو سیمینارەدا بە قوتابیانی خولی 19ـی ئەکادیمیای پارتی ڕاگەیاند كە، پارتی شانازی بە گەنج و لاوانی پێگەیشتووی وەکو ئێوە دەکات کە لە قوتابخانەی پارتی و رێبازی بارزانی لەسەر بیروباوەڕی نیشتمانی و نەتەوەیی گۆش کراون و تەئکیدیشی کردەوە هەماهەنگ و هاوکار بن لە پاراستن و پێشکەوتنی دەستکەوتەکانی ئەمڕۆی خەڵکی کوردستان.
پاشان قادر قاچاغ لەسەر بیرەوەریی شۆڕشی گوڵان و خەبات و بەرخودانی ئەم شۆرشە پەیڤێکی پێشکەش کرد و هۆزانێکی لەسەر شۆرش بۆ ئامادەبووان خوێندەوە.
