لقێ 1پارتی، سوپاسیا خه‌لكێ شه‌ره‌فمه‌ندێ باژێرێ دهوكی دكه‌ت
دهوك-KDP.info- بهه‌لكه‌فتا بدوماهیك هاتنا پروسا هه‌لبژارتنێن جڤاتا نوینه‌رێن عیراقێ وجڤاتێن پارێزگه‌هێن هه‌رێمێ لقێ ئێكێ پارتی دیموكراتی كوردستان بروسكه‌ك به‌لاڤكر ئه‌ڤه‌ژی ده‌قێ وێ یه.
هه‌لبژارتنێن جڤاتا پارێزگه‌ها دهوكێ و په‌رله‌مانێ عیراقێ ل روژا 30/4/2014 ل سنورێ پارێزگه‌ها دهوكێ ب ره‌نگه‌كێ شارستانی و دیموكراسی و ئازادانه ژلایێ خه‌لكێ سه‌ربلندێ دهوكێ ڤه هاتنه ئه‌نجامدان.
جه‌ماوه‌رێ دهوكێ دویر ژ جیاوازیێن سیاسی و ئولی و نه‌ته‌وه‌یی ب ئازادی ده‌ربرین ژ هه‌ستا خو كر به‌رامبه‌ر ئه‌ركێن نیشتیمانی و نه‌ته‌وه‌یی، و ب ره‌نگه‌كێ به‌رفره‌ه پشكداری هه‌لبژارتنان بوون، و ب ئازادانه ده‌نگ دانه هه‌ر دوو لیستێن پارتی دیموكراتی كوردستان حه‌فتێ و شه‌ش یا جڤاتا پارێزگه‌ها دهوكێ و دوو سه‌د و سێزده یا په‌رله‌مانێ عیراقێ.
بڤێ هه‌لكه‌فتێ لقێ ئێكێ پارتی دیموكراتی كوردستان، سوپاسیێن خو پێشكێشی گشت خه‌لكێ شه‌ره‌فمه‌ندێ باژێرێ دهوك و سێمێلێ دكه‌ت و سوپاسیا هه‌لویست و پشته‌ڤانیا هێزێن ئیمناهیێ و ناڤخو و هه‌می دام و ده‌زگه‌هێن حكومی و رێكخراوێن جڤاكێ سڤیل و سه‌ندیكا و ده‌زگه‌هێن راگه‌هاندن و چالاكڤانێن تورا فه‌یسبوكێ و قوتابیان و لاوان و ئافره‌تان بو پشكداری و رولێ وان د پروسێسا هه‌لبژارتنان دا.
سوپاسی و رێز بو پشكداریا پێشمه‌رگه و بنه‌مالێن شه‌هیدان و ماندیبونا ئه‌ندام و لایه‌نگر و كادرێن پارتی دیموكراتی كوردستان ژ پێخه‌مه‌ت كوردستانه‌كا ب هێز و ئازاد و ئاڤه‌دان.
