به‌رنامه و پشته‌ڤانیا لیستێن (213) و (76) د سمیناره‌كێدا ل چه‌مانكێ
ل دویڤ به‌رنامێ ژورا هه‌لبژارتنان ل سنورێ لقێ 18 بو بانگه‌شه‌یا هه‌لبژارتنان و بو هاندانا خه‌لكی بو پشته‌ڤانیا هه‌ردوو لیستێن پارتی دیموكراتی كوردستان و، دیاركرنا به‌رنامێن لیستێن (213) و (76) و دانه‌ناسینا به‌ربژارێن سنورێ لقێ 18، لیژنا ناوچا چه‌مانكێ یا پارتی سمیناره‌ك بو به‌رپرسێ لقێ سازكر ل روژا سێشه‌مبی رێكه‌فتی 22/4/2014 ل سه‌نته‌رێ ناحیا چه‌مانكێ و سه‌رپه‌رشتێ میحوه‌ری و به‌رپرسێ لیژنێ و هژماره‌كا زور ژ ته‌خ و چینێن جودا ژ موسلمان و مه‌سیحیان تێدا به‌رهه‌ڤبوون.
پشتی خوله‌كه‌ك بێده‌نگی راوه‌ستان رێزگرتن بو گیانێ شه‌هیدان و سه‌ركاروانێ وان بارزانیێ نه‌مر و ئیدریسێ هه‌رده‌م ساخ، هێژا (فه‌ریق فاروق) به‌رپرسێ لقێ د سمینارا خودا تشیك خستنه سه‌ر چه‌ندین ته‌وه‌رێن گرنگ، سه‌باره‌ت گرنگیا هه‌ردوو هه‌لبژارتنان و گوت: (هه‌ر ئێك ژ ڤان هه‌لبژارتنان گرنگیا خو یا تایبه‌ت هه‌یه، هه‌لبژارتنێن جڤاتا نوێنه‌رێن ئیراقێ گرێدای چاره‌نڤیسێ مه‌نه وه‌ك كورد و بێ گومان چه‌ند هژمارا پارتییان پتر بیت هێز و سه‌نگا كوردان دێ باشترر بیت ژ بو به‌ره‌ڤانیكرن ژ ده‌سكه‌فتێن گه‌لێ مه و مسوگه‌ركرنا ده‌سكه‌فتێن مه‌زنتر، و سه‌باره‌ت هه‌لبژارتنێن پارێزگه‌هان خویا كر كو جڤاتا پارێزگه‌هێ په‌رله‌مانه‌كێ بچویكه و دێ خودان بریار بیت له‌وما پێتڤییه رێژا پارتی یا بلند بیت و نوێنه‌رێن ده‌ڤه‌را ئامێدیێ دناڤدا هه‌بن ژبو پێشكێشكرنا باشترین خزمه‌ت بو ده‌ڤه‌رێ).
ده‌رباره‌ی به‌رنامێن هه‌ردوو لیستان گوت هه‌ردوو به‌رنامه ب ده‌ستێن كه‌سانێن بسپور و شاره‌زا هایتنه نڤێسین و بجهكرنا برگێن وان دێ بنه ئه‌گه‌رێ خوشگوزه‌رانیا ژیانا خه‌لكی).
و ده‌رباره‌ی به‌ربژارێن هه‌ردوو لیستان ب گشتی و یێن سنورێ لقێ 18 ب تایبه‌تی گوت : (ئه‌و هه‌می كه‌سانێن خودان شیان و لێهاتینه و جهێ باوه‌ریا مه‌نه و خه‌مخورن ژبو خزمه‌تكرنا خه‌لكێ خو). و دبه‌رده‌وامیا په‌یڤا خودا بكورتی لدور ژیاننامه و كارنامێن ڤان به‌ربژاران په‌یڤی (محمد سعید رێكانی، نه‌جیبه نه‌جیب، اسماعیل قه‌نجو رێكانی، رزگار صدقی نێروه‌یی، شیلان حسین هێتیتێ، نزارعبدالله دوسكی، هشیار سعید ئه‌ره‌دنی) و گوت:( نه بتنێ ئه‌ركه ئه‌م ده‌نكێ خو بده‌ینێ به‌لكو پێتڤییه بو كار بكه‌ین.)، و به‌رپرسێ لقێ پێشبینیا خو ب سه‌ركه‌فتنه‌كا مه‌زن نیشاندا .
و ل دویڤدا ڤان به‌ربژێران خو دا نیاسین و به‌رنامێ خو دیاركر و سوزدا هه‌می شیانان بمه‌زێخن ژبو خزمه‌تا كوردستانێ ب گشتی و ده‌ڤه‌را ئامێدیێ ب تایبه‌تی:-
1- (محمد سعید شكری ملا سعید رێكانی)، ژماره (21)، لیستا ژماره (213).
2- (رزگار صدقی شكر محمد نێروه‌یی)، ژماره (20)، لیستا ژماره (76).
ژ هه‌ژی گوتنێیه كو هه‌ر (5) به‌ربژارێن دی ژبه چه‌ند پێگیریان ل هنده‌ك جهێن دی نه‌شیان ل ڤێ سمینارێ به‌رهه‌ڤبن و داخوازا لێبورینێ ژ به‌رپرسێ لقێ و خه‌لكێ ده‌ڤه‌رێ كریه.
عه‌لی رێكانی – قه‌دش
