ل ئامێدیێ، د سالروژا ژ دایكبوونا (بارزانی) دا زاروك هاتن خه‌لاتكرن ودار هاتن چاندن
ب هه‌لكه‌فتا (111)ـمین سالڤه‌گه‌را بیره‌وه‌ریا ژ دایكبوونا سیمبول و بابێ روحیێ نه‌ته‌وا كورد (بارزانیێ نه‌مر) لقێ18 یێ پارتیا ده‌موكراتا كوردستانێ ولیژنێن بسه‌رڤه و ده‌زگه‌هێن میری ل سنورێ قه‌زا ئامێدیێ و ناحیێن بسه‌رڤه چه‌ندین بزاڤ وچالاكی ئه‌نجامدان.
د سه‌ره‌دانه‌كێدا بو نه‌خوشخانا ئامێدیێ (فه‌ریق فاروق) به‌رپرسێ لقێ18 و (مشیر محه‌مه‌د) قایمقامێ ئامێدیێ ب وه‌كاله‌ت دگه‌لدا هه‌ژماره‌كا كارگێر و كادرێن لقێ و رێڤه‌به‌رێن داموده‌زگه‌هێن میری دیاریێن دراڤی لسه‌ر وان زارویان پارڤه‌كرن یێن شڤێدی و ئه‌ڤرو ژ دایكبووین و داخوازا ژیه‌كێ درێژ و پاشه‌روژه‌كا گه‌ش بو خاست، هه‌روه‌سان سه‌ره‌دانا هه‌می نه‌خوشێن ل نه‌خوشخانێ كر و دیاریێن لقێ لسه به‌لاڤكرن و داخوازا سلامه‌تیێ ژ خودایێ مه‌زن بو كر و ئه‌ڤ سه‌ره‌دانه بونه جهێ دلخوشیا نه‌خوشان.
ل دووڤدا و هه‌ر ب هه‌مان هه‌لكه‌فت شاندێ ناڤهاتی پشكداری د هه‌وه‌كا دارچاندنێ دا كر ل پاركا گشتی یا ئامێدیێ و هه‌ژماروكا زور ژ دارێن هه‌مه‌ره‌نگ هاتن چاندن.
هه‌ر بڤێ هه‌لكه‌فتێ ل سنورێ لیژنێن پارتی ل ناحیێن (سه‌رسنك، شێلادزێ، دێره‌لوك، كانی ماسێ، بامه‌رنێ، چه‌مانكێ)و لیژنا سیریێهه‌وێن به‌رفره‌هێن پاقژكرن و دارچاندنێ هاتن ئه‌نجامدان.
د لێدوانه‌كێدا بو ده‌زگه‌هێن راگه‌هاندنێ (فه‌ریق فاروق) به‌رپرسێ لقێ18 گوت :- (ب هه‌لكه‌فتا 111 سالیا ژ دایكبوونا بابێ روحیێ نه‌ته‌وا كورد (مه‌لا مسته‌فایێ بارزانی) وه‌كو هه‌ر سال ل ده‌ڤه‌را ئامێدیێ ئه‌ڤ ساله‌ژی مه چه‌ندین بزاڤ و چالاكی ئه‌نجامدان ژ وان خه‌لاتكرنا وان زاروكێن د ئه‌ڤروكه‌دا هاتینه سه‌ر دونیایێ و سه‌ره‌دانا نه‌خوشێن ل نه‌خوشخانا ئامێدیێ و به‌لاڤكرینا شریناهیان لسه‌ر، و ل ڤی جهی مه هه‌ژماره‌كا دارا چاندن و ل دویڤ به‌رنامێ لقێ ل هه‌می لیژنا ژی ئه‌ڤ جوره بزاڤه و هنده‌كێن دی ژی هه‌ر ئه‌ڤرو دێ هێنه ئه‌نجامدان. ب راستی ئه‌ڤرو و ب ڤێ هه‌لكه‌فتێ چ بكه‌ین هه‌ر كێمه بو بیره‌وه‌ریا سه‌ركرده‌‌كی كو هێشتا ژیێ وی سێ سال كه‌فتیه زیندانان و هه‌می ژیانا خو ب خه‌بات و تێكوشینێ و نه‌خوشی و ده‌ربه‌ره‌ری بوراندی ژ بو كێشا گه‌لێ خو، ئه‌م خو سه‌ربلند دبینین ب هه‌بوونا هێمایه‌كێ وه‌كێ بارزانیێ نه‌مر و فه‌خر و شانازیێ پێ دبه‌ین هه‌ر وه‌ك هه‌ر میلله‌ته‌كێ دی یێ جیهانێ كو شانازیێ ب سیمبولێن خو دبه‌ن و ئه‌م ب ئه‌ركێ خو دزانین كو ڤێ بیره‌وه‌ریێ زیندی بكه‌ین.)
ژ لایێ خوڤه (مشیر محه‌مه‌د) قایمقامێ قه‌زا ئامێدیێ ب وه‌كاله‌ت د لێدوانه‌كێدا بو ده‌زگه‌هێن راگه‌هاندنێ گوت:- (بو به‌رز راگرتنا یادا چارده‌ی ئادارێ بیره‌وه‌ریا ژ دایكبوونا بارزانیێ نه‌مر مه بفه‌ر دیت ل سه‌نته‌رێ قه‌زا ئامێدیێ ب چه‌ند چالاكیان رابین وه‌ك سه‌ره‌دانا نه‌خوشخانا ئامێدیێ ژ بو ئاگه‌هداربوون لسه‌ر ره‌وشا ساخله‌میا وان و دیسان هه‌وه‌ێن پاقژكرن و دارچاندنێ ل ته‌ڤایا ناحیێن قه‌زایێ هاتینه بجهئینان و مه بفه‌ردیت ڤێ جارێ هه‌وا دارچاندنێ ل جهه‌كی بیت كو ئه‌م بشێین چاڤدێریێ لێ بكه‌ین له‌وما ئه‌ڤ جهه یانكو پاركا گشتی یا ئامێدیێ هاتیه هه‌لبژاردن، هیڤی دكه‌م ڤێ بیره‌وه‌ریێ ئه‌م هه‌می به‌رز راگرین ژبه‌ركو (بارزانی)ێ نه‌مر سیمبوله‌كه بو مه وه‌ك نه‌ته‌وا كورد).
عه‌لی رێكانی – قه‌دش
