34 پارت و لایەنی کوردستانی لە هەولێر كۆ بوونەوە

ئەمرۆ لە بارەگای لقی دووی پارتی دیموکراتی کوردستان بە ئامادەبوونی عەلی حسین بەرپرسی لقی دوو کۆبوونەوەیەکی فراوانی 34 پارت ولایەنی کوردستانی بەهەموو پێکهاتەکانییەوە، بەرێوە چوو و تێیدا یادی 11ی ئاداری ئازادکردنی شاری هەولێر، کە هاوکاتە لەگەل رێکكەوتنامەی مێژووی 1970ـیان خستە بەر باس و بەیاننامەیەكیشیان دەر كرد.

 

كۆبوونەوەكەی لایەنەكان بۆ هەماهەنگیکردن و کۆدەنگی بوو لەسەر بەیاننامەیەکی هاوبەش لەسەر 11ی ئاداری ئازادکردنی شاری هەولێر، کە هاوکاتە لەگەل رێکكەوتنامەی مێژووی 1970 و پالپشتیکردن لە ئەزموونی دیموکراتی و یەکهەلوێستیی نەتەوەیی و نیشتمانی لەسەر پرسە هەنوکەییەکانی ئەمرۆی گۆڕەپانی سیاسی و داکۆکیکردن لە دەستکەوتەکانی هەرێمی کوردستان.

لە میانی کۆبوونەوەکەدا بەرپرسی لقی دوو وێرایی پیرۆزبای لە خەلکی کوردستان و بنەمالەی شەهیدان و پێشمەرگە قارەمانەکانی گەلی کوردستان بەبۆنەی ئازادکردنی شاری هەولێر، هەروەها جەخت لە هەماهەنگی و یەکهەلوێستی لەسەر پرسە نەتەوەیی و نیشتمانییەکانی گەلی کوردستان کرایەوە.