فه‌ریق فاروق: به‌غدا به‌رده‌وام گرفتان په‌یدا دكه‌ت و مه‌زن دكه‌ت
فه‌ریق فاروق به‌رپرسێ لقێ ١٨ یێ پارتیا ده‌موكراتا كوردستانێ دگه‌لدا شڤان ئامێدی كارگێرێ لقێ به‌رپرسێ نڤێسنگه‌ها هه‌لبژاردنان ل دووڤ به‌رنامه‌كێ دارشتی و د سه‌ره‌دانه‌كا چاڤه‌رێكری دا گه‌هشته ده‌ڤه‌را به‌رواری بالا و ل باره‌گایێ لیژنا ناوچا كانی ماسێ ژ لایێ (چاڤشین عومه‌ر) به‌رپرسێ لیژنێ و سامی ئو‌شانا رێڤه‌به‌رێ ناحیێ و كارگێر و كادرێن لیژنێ و كه‌سایه‌تیێن ده‌ڤه‌رێ هاتن پێشوازیكرن، و چه‌ندین سه‌ره‌دان ئه‌نجامدان و سێ سمینار پێشكێشی ته‌خ و چینێن جودا یێن ده‌ڤه‌رێ كرن ل درێژاهیا روژا ئێكشه‌مبی رێكه‌فتی ٩/٣/٢٠١٤.
ل ده‌مژمێر (١٠)ی سپێدێ و ل هولا لیژنێ ئێكه‌م سمینار پێشكێشی هه‌لبژاردی و ریهسپی و كه‌سایه‌تیێن ده‌ڤه‌رێ كر و تێدا ئاماژه دا رولێ ده‌ڤه‌را به‌رواریا د خه‌بات و شوره‌شێن دژی دوژمنان و به‌حسێ ره‌وشا سیاسی یا ئه‌ڤرو یا ئیراقێ ب گشتی و هه‌رێما كوردستانێ ب تایبه‌تی كر، دیسان به‌حسێ ده‌رئه‌نجامێن هه‌لبژاردنێن بوری كر و هه‌ولێن پێكئینانا حكومه‌تا نوی یا هه‌رێمێ ب سه‌روكاتیا به‌رێز نێجبرڤان بارزانی و وان پروپاكندێن دڤی بواریدا دهێنه كرن ژبو تومه‌تباركرنا پارتی ب گیروكرنا پێكئینانا حكومه‌تێ لده‌مه‌كی كو پارتی هه‌می شیانان دمه‌زێخیت ژبو رازیكرنا هه‌می ئالیان ژبو پێكئینانا حكومه‌ته‌كا بنكه به‌رفره بو خزمه‌تا گه‌لێ كوردستانێ. و دوپاتكر كو حكومه‌تا نها نه‌یا كاربرێڤه‌به‌ره و گرفتا دابه‌شكرنا مووچه‌یان ب زووترین ده‌م دێ هێته ب دوماهی ئینان.
سه‌باره‌ت ئالوزیێن ناڤبه‌را به‌غدا و هه‌ولێرێ گوت قه‌یران نه‌یێن ئه‌ڤرو بتنێ نه به‌لكو هه‌ر ژ ٢٠٠٣ و تا ئه‌ڤرو به‌غدا به‌رده‌وام گرفتان په‌یدا دكه‌ت و مه‌زن دكه‌ت و چ جاران هزر د چاره‌یاندا نه‌كریه وه‌ك نه دروستكرنا جڤاتا فیدرالی و كێشه‌یێن بودجێ و ماددا ١٤٠ و نه‌ئه‌نجامدانا سه‌رژمێریێ و نه‌دانا موچه‌یێن پێشمه‌رگه‌ی و چه‌ك وپێتڤی و راهێنانێن وان.
دیسان ته‌كه‌ز كر كو مالكی ب ره‌فتارێن خو یێن نه دجهێ خودا بویه جهێ نه‌رازیبوونا زوربه‌یا پێكهاتێن ئیراقێ له‌وما هه‌می لایه‌نان هوشداری دایێ وه‌ك ئه‌مریكا و ئێكه‌تیا ئه‌وروپی و دیسان سه‌روكێ بارزانی و حكومه‌تا هه‌رێمێ ب باشترین ره‌نگ به‌رسڤا لێدوانێن وی دایه.
هه‌روه‌سان به‌رپرسێ لقێ ئاماژه‌دا هه‌لبژاردنێن داهاتی یێن په‌رله‌مانێ ئیراقێ و جڤاتێن پارێزگه‌هێن كوردستانێ و گرنگیا وان بو گه‌لێ كوردستانێ ژبو بهێزكرنا رولێ كوردان ل به‌غدا بو پاراستنا ده‌ستكه‌فتێن مه و داخواز ژێ كر هاندانا خه‌لكێ ده‌ڤه‌رێ بكه‌ن بو وه‌رگرتنا كارتێن ده‌نگدانێ بو مسوگه‌ركرنا مافێ پشكداریێ د هه‌لبژاردنێن داهاتیدا.
و ل دوماهیێ ده‌رگه‌هێ پرسیار و دانوستاندنان هاته ڤه‌كرن.
و ل ده‌مژمێر (١١:٣٠) هێژا به‌رپرسێ لقێ دووه‌م سمینار پێشكێشی كادرێن سه‌ر ب لیژنا كانی ماسێ ڤه كر و زێده‌باری بابه‌تێن سمینارا ئێكێ ئاماژه‌دا هه‌لكه‌فت و بیره‌وه‌ریێن ئادارێ و پێدڤییا گرنگی پێدانێ و دیسان هاندانا كادران كر ژبو پتر نێزیك بوون ژ خه‌لكی و خو ماندیكرن و هه‌لسه‌نگاندنا شیان و كارێن خو و لیژنێ و لقێ و دیاركرنا خالێن ب هێز بو پتر گرنگی پێدان و یێن لاواز ژبو چاره‌كرنێ.
و ل ده‌مژمێر (٢:٣٠)ی پشتی نیڤرو ل هولا ناڤه‌ندا وه‌رزش و لاوان یا بریفكا هێژا به‌رپرسێ لقێ سێیه‌مین سمینار پێشكێشی هه‌ژماره‌كا به‌رچاڤ ژ هه‌لبژاردی و ریهسپی و كه‌سایه‌تیان و لاو و ئافره‌ت و قوتابیان كر و بو ماوێ ده‌مژمێره‌كێ ل دور ره‌وشا سیاسی یا ئه‌ڤرو یا ئیراقێ و هه‌رێما كوردستانێ و گه‌له‌ك بابه‌تێن دی په‌یڤی.
و لدووڤدا سه‌ره‌دانا چه‌ندین خێزانێن ده‌ڤه‌را به‌رواری بالا كر و ژ نێزیك هایداری ره‌وشا ژیارا وان بوو و بگه‌رمی هاته پێشوازیكرن و سه‌ره‌دانێن به‌رپرسێ لقێ بونه جهێ دلخوشیا خه‌لكێ ده‌ڤه‌رێ.
عه‌لی رێكانی / قه‌دش
