لقێ18 سمیناره‌ك بو نه‌جیبه نه‌جیب ئه‌نداما په‌رله‌مانێ ئیراقێ سازكر
لقێ 18یێ پارتی دیموكراتی كوردستان – نڤێسنگه‌ها روشه‌نبیری و راگه‌هاندن سمیناره‌ك بو نه‌جیبه نه‌جیب ئه‌نداما په‌رله‌مانێ ئیراقێ سازكر لروژا پێنج شه‌مبی رێكه‌فتی 13/2/2014 ل هولا رێڤه‌به‌ریا روشه‌نبیری و هونه‌ری ل ئامێدیێ.
ب به‌رهه‌ڤبوونا فه‌ریق فاروق به‌رپرسێ لقێ و كارگێر و كادرێن لقێ و به‌رپرس و كارگێر و كادرێن لیژنێن بسه‌رڤه لده‌مژمێر (11) سپێدێ ب خوله‌كه‌ك رێزگرتن بو گیانێ شه‌هیدان و سه‌ركاروانێ وان بارزانیێ نه‌مر و كاك ئدریسێ هه‌رده‌م ساخ رێ و ره‌سمان ده‌سپێكر و ژلایێ عه‌ونی ئه‌رتیسی كارگێرێ لقێ به‌رپرسێ نڤێسنگه‌ها روشه‌نبیری و راگه‌هاندن چالاكی هات برێڤه‌برن.
په‌رله‌مانتار نه‌جیبه نه‌جیب ل ده‌سپێكا سمینارا خو سوپاسیا لقێ 18كر ژبو روخساندنا ڤێ ده‌رفه‌تێ و ته‌وه‌رێن سمینارا خو دیاركرن.
پشتی پێناسه‌كرنا بودجێ و دیاركرنا جوداهیێ دناڤبه‌را (میزانیه و موازنه) ب كورتی گورانكاریێن بسه‌ر بودجا ئیراقێ دا هاتین د هه‌یاما چه‌ندین سالاندا به‌رچاڤكرن و دیاركر كو ل ده‌مێ رژێما به‌عسا گور به‌گور 95% ژ بودجێ بو چه‌ك و شه‌ر و وێرانكرنا ئیراقێ و وه‌لاتێن ده‌ور وبه‌ر دهاته ته‌رخانكرن.
به‌لێ خویاكر كو ژبه‌ر نه‌بونا پلانێن باش سه‌ره‌رای بورینا 10 سالان ژ رزگاركرنا ئیراقێ ب ره‌نگه‌كێ باش مفا ژ بودجێ نه‌هاتیه وه‌رگرتن و تا نها پالپشتیا سه‌ره‌كی ب نه‌فت و گازا یه و ئابورناس ب خاله‌كا نێگه‌تیف دزانن كو تا نها بوارێن چاندن و پیشه‌سازی و گه‌شت و گوزار و ....ب دروستی نه‌هاتینه به‌رهه‌مئینان و مفا ژێ نه هاتیه وه‌رگرتن وه‌ك پێتڤی.
لدووڤدا روونكرنه‌ك دا به‌هرا هه‌رێمێ كو رێژه‌كا گه‌له‌گ كێمتر ژ 17% دگه‌هیته هه‌رێمێ ب به‌هانه‌یێن جودا جودا هه‌ر چه‌نده هندك دجهێ خودانه به‌لێ سال بو سال برگێن نوی لێ زێده‌دبن و چ یاسا نینن ڤێ چه‌ندێ رێكبێخن وه‌ك: خه‌رجیێن سه‌روه‌ری (نفقات سیادیه) ، به‌رگری ، .... و بڤێ چه‌ندێ زیانه‌كا مه‌زن ب كوردستانێ دكه‌ڤیت.
نه‌جیبا خانێ دیاركر كوب بودجا سالا 2014 ێ (170) ترلیون دینارن.
سه‌باره‌ت كێشێن ناڤبه‌را هه‌رێمێ و به‌غدا نه‌جیبا خانێ گوت بودجا پێشمه‌رگه‌ی (موچه ، چه‌ك ، راهێنان ، جلوبه‌رگ ،....) سه‌ر وه‌زاره‌تا به‌رگریا ئیراقا فیدراله ل گوره‌ی دستورێ ئیراقا فیدرال كو پێشمه‌رگه ب (حرس الاقلیم) ناساندیه به‌لێ تا نها ئه‌ڤ چه‌نده نه‌هاتیه كرن و به‌غدا موسته‌حه‌قاتێن پێشمه‌رگه‌ی نه‌داینه.
ناكوكیا دووێ گرێدای نه‌فتێ یه و ده‌ستخوشی ل حكومه‌تا هه‌رێمێ كر بو هه‌لویست و بریارێن وێ و دوپاتكر ئه‌گه‌ر بڤی ره‌نگی نه‌بو نها ره‌وشا هه‌رێمێ دا وه‌ك یا پارێزگه‌هێن دن یێن ئیراقێ بیت كو رێژه‌كا مه‌زن یا نه‌فتێ لێ دهێته به‌رهه‌م ئینان و فروتن به‌لێ ژ كێم و كاسی و بێ خزمه‌تی دنالن.
هه‌روه‌سان گوت ل سالا 2007ێ ره‌شنڤیسێ یاسا نه‌فت و گازێ هاته نڤێسن و د دیباجێدا هاتبوو پێتڤییه د ماوێ 6 مه‌هان دا بهێته په‌سه‌ند كرن به‌لێ تا نها هاتیه پاش گوهی خستن .
زێده‌تر نه‌جیبا خانێ گوت نه‌رازیبونا مه یا سه‌ره‌كی نها لسه‌ر برگێن سزادانێیه (عقابیه) كو روژ بو روژ زێده‌دكه‌ن بو نمونه برگه‌ك دبێژیت ئه‌گه‌ر هه‌رێم روژانه (400000) به‌رمیلان نه‌هنێریت بودجا 17% دێ هێته برین و دیسان دبێژن ئه‌گه‌ر نه‌هێلن كابلا زه‌وئی لناڤ هه‌رێمێ ب بوریت دێ بودجێ برین و هوسان تا دگه‌هیته كێمترین تشت .
نه‌جیبا خانێ دیاركر كو پروژك ژبو قه‌ره‌بوكرنا قوربانی و زیان ڤێكه‌فتیێن سه‌ر ده‌ستێ رژێما به‌عس نها ل په‌رله‌مانێ ئیراقێیه و په‌رله‌مانتارێن كورد ب پشته‌ڤانیا رێزدار سه‌روكێ حكومه‌تا هه‌رێمێ ب هه‌می شیانان كار بو په‌ژراندنا وێ دكه‌ن و ئه‌گه‌ر جێبه‌جێ ب بیت خه‌لكێ مه دێ مفایه‌كێ مه‌زن ژێ وه‌رگریت.
ل دوماهیێ هێژا فه‌ریق فاروق به‌رپرسێ لقێ سوپاسیا نه‌جیبا خانێ كر و ئاماژه دا رولێ وێ یێ به‌رچاڤ و كارا د به‌ره‌ڤانیكرن ژ ماف و به‌رژه‌وه‌ندیێن گه‌لێ مه ل په‌رله‌مانێ ئیراقێ كو ب دروستی ژ هه‌ژی وی جهی یه ، و پاشان ده‌رفه‌ت بو پرسیاركرن و دیاركرنا راو و بوچونان هات دان و ب درێژی به‌رسڤ ژ لایێ ئه‌نداما په‌رله‌مانێ ئیراقێ لسه‌ر هاته دان.
