لقێ ئێك سالڤه‌گه‌رێن ئدریس بارزانی و ئێكێ شواتێ زێندی دكه‌ت
لقێ ئێكێ پارتی دیموكراتی كوردستانێ به‌یاننامه‌ك ب هه‌لكه‌فتا سالیادا وه‌غه‌ركرنا ئدریس بارزانیێ جوانه‌مه‌رگ و برۆسكه‌كا وه‌فاداریێ ب هه‌لكه‌فتا كاره‌ساتا ئیكێ شواتێ به‌لاڤكرینه.
د به‌یانناما ئێكێ دا كو ب هه‌لكه‌فتا سالیادا وه‌غه‌ركرنا ئدریس بارزانیێ جوانه‌مه‌رگ هاتیه كو ئێك ژ وان شوره‌شگێر و سه‌ركرده و سیاسه‌ت مه‌دار و كه‌سایه‌تیێن ژێهاتی بوویه كو هه‌می ژیێ خو ژ پێخه‌مه‌ت دوزا گه‌لێ كورد و ئارمانجێن نه‌ته‌وه‌یی ته‌رخان كربوو كو ژ ئه‌گه‌رێ نه‌خوشیه‌كا گران ل 13/1/1987وه‌غه‌را دووماهیێ ژ ده‌ست دانا ڤی سه‌ركرده‌یی د ژیه‌كێ گه‌نج و كاودانێن ناله‌بارێ گه‌لێ كورد تێدا ده‌رباز د بوو زه‌ره‌ره‌ك مه‌زن بوو بو بزاڤا رزگاریخوازا كوردستانێ، چونكو ئدریسێ جوانه مه‌رگ ل به‌ر ده‌ستێ بارزانیێ نه‌مر فێری وانێن كوردایه‌تیێ و به‌رخودانێ ببوو له‌ورا خودان ئه‌زمونه‌كا سیاسی و پر ده‌ستكه‌فت و سه‌ركه‌فتن بوویه، ژ وان ده‌ستكه‌فتێن هه‌ره گرنگ ده‌ستپێشخه‌رێ پێك ئینانا به‌ره‌یێ كوردستانی بوو و شیا هه‌موو هێز و پارتێن كوردستانی د ئێك سه‌نگه‌ر دا كوم بكه‌ت، ژ به‌ر هه‌لویستێن وی یێن نیشتیمان په‌روه‌ری ب ئه‌ندازیارێ ئاشتبوونا گشتی هاته ب ناڤكرن.
د برۆسكا وه‌فاداریێ دا ب هه‌لكه‌فتا كاره‌ساتا ئیكێ شواتێ هاتیه »كاره‌ساتا ئیكێ شواتێ ل سالا 2004 پیلانه‌كا دارشتی یا تیروریستی بوو كو ب ده‌هان سه‌ركرده و كادر و پیشمه‌رگه و وه‌لاتیێن سڤیل شه‌هید و برینداربوون، گه‌لێ كوردستانێ سه‌ره‌رایی هه‌ولێن به‌رده‌وامێن هوڤانه‌یێن دوژمنان رۆژ بۆ رۆژێ ده‌ستكه‌فتێن مه‌زنتر ب ده‌ست خوه ڤه د ئینیت و ژ ئه‌نجامێ خوینا وان شه‌هیدان وه‌لاتێ مه د گه‌شه‌پێدانێ دایه و به‌ر ب ئاسویا سه‌ركه‌فتنێ ڤه د چیت، كاره‌ساتا ئێكێ شواتێ خاله‌كا ره‌شه د دیروكێ دا ناهێته ژ بیر كرن، د ڤێ رۆژێ دا كریارا هوڤانه یا دوژمنێن گه‌لێ كوردستانێ شه‌رمزار دكه‌ین.
