ب هەلكەفتا سێدارەدانا دكتاتورێ ئیراقێ سەدامێ گور بەگور لقێ ئێك به‌یاننامه‌ك به‌لاڤركر
ل سەر دەمێ رژێما بەعسا رۆخایی خەلكێ ئیراقێ د كاودانێن پر تراژیدی دا د ژیان، و گەلێن ئیراقێ ب تایبەت گەلێ كوردستانێ توشی مەزنترین مەینەت و كارەساتێن بێ وێنە د دیروكا مروڤایەتیێ دا بوینە، ژ كیمیا باران و ئەنفالكرن و جینوساید و كاڤلكرن و سیاسیەتێن شوفینی یێن تەعریب كرن و دژی ئازادی و مافێن مروڤی، و شەرێن نە ڕەوا دگەل وەلاتێن ئیران و كوەیت و هەڤپەیمانیێن نیڤ دەولەتی.
سێدارەدانا سەدام حسین دكتاتورێ چەرخێ بیستێ پشتی دادگەهكرنەكا بێ وێنە و دادپەروەرانە، ب دوماهیك ئینانا ئیراقەكا دكتاتوری و مەركەزی و تاكرەوی بوو، و دەستپێكەك بوو بۆ ئاڤاكرنا ئیراقەكا فیدرال و دیموكراسی و پەرلەمانی.
د ڤێ رۆژێ دا پیروزباهیان ل تەڤایا كەس و كارێن شەهیدان و قوربانیێن سیاسەتێن دویر ژ بنەمایێن مروڤایەتیێ یێن رژێما بەعسا بن گور دكەین و داكوكیێ دكەین كو هەرێما كوردستانێ بەرەف پاشڤە ناچیت و دووپات دكەین ب هیچ رەنگەكی دەست ژ مافێن رەوایێن یێن گەلێ خۆ بەرنادەین.
هیڤی خازین رۆژا سێدارەدانا سەدامێ دكتاتور ببیتە رۆژا بنبركرنا بنەمایێن ستەم و زورداریێ و ببیتە رۆژا پێگڤە ژیانا تەبایی و ئازادیا گەلێ ئیراقێ و كوردستانێ.
لقێ ئێك
پارتی دیموكراتی كوردستان
29/12/2013
