به‌رپرسێ لقێ 14 یێ پارتی دگه‌ل ئه‌ندامێن جڤاتا پارێزگه‌ها مویسل كومبوو
مویسل/ عسمه‌ت ره‌جه‌ب به‌رپرسێ لقێ چارده یێ پارتی دیموكراتی كوردستان و سه‌روكێ لیستا برایه‌تی و پێكڤه ژیانێدگه‌ل هه‌می ئه‌ندامێن جڤاتا پارێزگه‌ها مویسل یێن سه‌ر ب لیستا برایه‌تی و پێكڤه ژیانێ ڤه ب به‌رهه‌ڤبوونا سه‌روكێ جڤاتا پارێزگه‌ها مویسل و هژماره‌كا به‌رپرسێن دام و ده‌زگه‌هێن میری ل قه‌زا و ناحیان كومبوو، د وێ كومبوونێ دا به‌حسێ ره‌وشا پارێزگه‌ها مویسل ب گشتی و ره‌وشا ئێمناهیێ و باشتركرنا كارێ هه‌ڤپشكێ دام و ده‌زگه‌هێن میری و پێشكێشكرنا باشترین خزمه‌تگوزاریان بو خه‌لكێ ده‌ڤه‌رێ و ئه‌نجامدانا پروژێن گرنگ دبیاڤێن جودا یێن ژیانێ دا بو خه‌لكێ ده‌ڤه‌رێ ب گشتی هاته‌كرن .
د په‌یڤه‌كێ دا به‌رپرسێ لقێ چارده یێ پارتی دیموكراتی كوردستان ئه‌ندامێن جڤاتا پارێزگه‌ها مویسل یێن سه‌ر ب لیستا برایه‌تی و پێكڤه ژیانێ هاندان كو لسه‌ر بنه‌مایێ ته‌وافقێ و لێك تێگه‌هشتنێ و پێكڤه كاركرنێ كاربكه‌ن و خو ل ئاریشه و كێم و كاسیێن خه‌لكی بكه‌نه خودان و پروژێن پێدڤی و لدویڤ داخازیا خه‌لكی ئه‌نجام بده‌ن هه‌روه‌سا كاربكه‌ن بو ئه‌نجامدانا پروژێن خزمه‌تگوزاری و پێشكێشكرنا خزمه‌تێن جودا بو خه‌لكێ پارێزگه‌ها مویسل ب گشتی و ده‌ڤه‌رێن كوردستانی یێن ده‌رڤه‌ی هه‌رێمێ ب تایبه‌تی.
