سه‌ربه‌ست له‌زگین: مه‌ پێشبینیا زاخۆ دكر دێ بارانه‌كا ده‌نگێن زه‌ر پێشكێشی كورد و كوردستانێ كه‌ت

زاخو/ سه‌ربه‌ست له‌زگین به‌رپرسێ لقێ 8ێ پارتی دیموكراتی كوردستان ب به‌رهه‌ڤبوونا كاندیدێن پارتی ئه‌وێن ل ده‌ڤه‌را زاخو ده‌رچووین بو خولا چارێ یا په‌رله‌مانێ كوردستانێ سمیناره‌ك بو به‌رپرس و كادرێن نڤیسینگه‌هـ و لێژنێن سه‌ر ب لقێ 8 ڤه‌ پێشكێشكر.

ل ده‌ستپێكا سمینارێ دا به‌رپرسێ لقێ پیروزباهی ل خه‌لكێ زاخو كرن ب هه‌لكه‌فتا سه‌ركه‌فتنا پارتی دهه‌لبژارتنا دا و ده‌ست خوشی ل هه‌می كادرێن پارتی كرن ژبو كار و ماندیبوونا وان دماوێ هه‌وا هه‌لبژارتنا دا.

ل دیڤدا به‌رپرسێ لقێ روناهی به‌ردانه‌ سه‌ر ئه‌نجامێن هه‌لبژارتنا ئه‌وێن ژلایێ كومسیونێ ڤه‌ هاتینه‌ راگه‌هاندن و ئه‌و رێژا به‌رزا پارتی ل كوردستانێ بشێوه‌كێ گشتی ب ده‌ستڤه‌ ئیناین و ب تایبه‌تی ل ده‌ڤه‌را زاخو كو دگه‌هیته‌ (81%) و دیار كر كو دماوێ بوری دا مه‌ پێشبینی یا ڤی هه‌لویستی ژ خه‌لكێ زاخو دكر ژبه‌رهندێ مه‌ ب رونی گوت ڤێ جارێ ژی زاخو دێ بارانه‌كا ده‌نگێن زه‌ر پێشكێشی كورد و كوردستانێ كه‌ت و ئه‌ڤ چه‌نده‌ ژی زڤراند بو وه‌فاداری و دلسوزیا خه‌لكێ زاخو و هه‌ر دیسان ئه‌و گرنگیا سه‌ركردایه‌تیا پارتی بڤێ ده‌ڤه‌رێ ده‌ت.

دته‌وه‌ره‌كێ دی دا به‌رپرسێ لقێ دیار كر ئه‌ڤ ئه‌نجامه‌ بارێ پارتی گرانتر لێ دكه‌ن له‌ورا دڤێت كادرێن پارتی ب هه‌می هێز و شیانێن خو دخزمه‌تا خه‌لكی دا بن و ببنه‌ پره‌ك بو گه‌هاندنا كێشه‌ و گرفتێن جه‌ماوه‌ری ب وجهێن په‌یوه‌ندیدار.

و ل دووماهیێ ئاماده‌بوویان پیروزباهیا كاندیدێن پارتی كر ئه‌وێن ل ده‌ڤه‌را زاخو ده‌رچووین بو په‌رله‌مانی.