لقێ ئێكێ په‌یامه‌ك سه‌باره‌ت كریارێن تیرورستى یێن دوهى ل باژێرێ هه‌ولێرێ رویداین به‌لاڤكر
لقێ ئێكێ پارتى دیموكراتى كوردستان په‌یامه‌ك سه‌باره‌ت كریارێن تیرورستى یێن دوهى ل باژێرێ هه‌ولێرێ رویداین به‌لاڤكر ، ئه‌ڤه ده‌قێ وێ یه::د ده‌مه‌كى دا كو خه‌لكێ كوردستانێ و دیموكراتخوازێن ل ده‌ڤه‌رێ و جیهانێ چاڤه‌رێى هه‌لبژارتنێن په‌رله‌مانێ هه‌رێما كوردستانێ بوون , پشتى كه‌رنه‌ڤالێ هه‌لبژارتنێن ئازاد و كێم وێنه ل ده‌ڤه‌را روژ هه‌لاتا ناڤه‌راست كو د پێلا تیرور و كوشتارێن ب كوم دا دژین , مخابن ده‌ستێن ره‌شێن تیرورێ ب مه‌ره‌مێن خو یێن پیس و چه‌په‌ل و دوژمنانه بو تێكدانا ره‌وشا ته‌نا و ئازاد و تێكداناكه‌یف و خوشیا خه‌لكێ كوردستانێ ب سه‌ركه‌فتنا پروسێسا هه‌لبژارتنان , ژ نشكه‌كێ ڤه هێرش كرنه سه‌ر ده‌زگه‌هێ ئاسایشا گشتى ل هه‌ولێرێ و د ئه‌نجام دا هژماره‌كا ئه‌فسه‌ر و كارمه‌ندێن قاره‌مانێن ئێمناهیێ شه‌هید و برینداربوون .بناڤێ لقێ ئێكێ پارتى دیموكراتى كوردستان و جه‌ماوه‌رێ چاڤنه‌ترسێ ده‌ڤه‌رێ سه‌ره‌خوشیێ ل بنه‌مال و كه‌س و كارێن شه‌هیدان و كارمه‌ندێن ئاسایشێ دكه‌ین و ب توندى ڤێ كریارا هوڤانه و نه‌مروڤایه‌تى شه‌رمزار دكه‌ین و دووپاتدكه‌ین كو ئه‌ڤ كریارێن تیرورستى نه‌شێن ئیراده و خه‌باتا خه‌لكێ كوردستانێ بو ئازادى و دیموكراسیێ ب راوه‌ستینن و كاروانێ پێشڤه‌چوون و ئاڤه‌دانیێ دێ یێ به‌رده‌وام بیت ، و داخوازێ ژ خه‌لكێ خو یێ دلسوز،و، وه‌فادار دكه‌ین وه‌كى هه‌ر جار د چاڤ ڤه‌كرى و هشیاربن لدور هه‌ر بزاڤه‌كا جهێ گومانێ بیت و ئاگه‌هداریا ده‌زگه‌هێن ئێمناهیێ بكه‌ن ، روى ره‌شى و شه‌رمزارى بو دوژمنێن تیرورست و ئازادى و ئاڤه‌دانى بو كوردستانێ و سه‌ربلندى بو شه‌هیدان .
لقێ ئێكێ پارتى دیموكراتى كوردستان
30/9/2013
