لقێ 17 یێ پارتی و خه‌لكێ شنگالی هژماره‌كا هاریكاریان گه‌هاندنه كه‌مپا دومیز
ئه‌ڤرو جه‌ماوه‌رێ لقێ هه‌ڤده یا پارتی دیموكراتی كورستان ل شنگالێ و ب هه‌ڤالینیا سه‌ربه‌ست بابیری به‌رپرسێ لقێ و مویه‌سه‌ر حه‌جی صالح قائیمقامێ قه‌زا شنگالێ هاریكاریێن جه‌ماوه‌رێ ده‌ڤه‌رێ گه‌هاندنه كه‌مپا دومیز یا ئاواره‌یێن كوردێن روژئاڤا كو ب كوژمێ سه‌د و چل و پێنج ملیون دیناران كه‌ل و په‌لێن پێدڤی بو ئاواره‌ییان دابین كرینه و چوار ترومبێلێن بار هه‌لگر گه‌هاندینه عمبارێن كه‌مپا دومیز و ژلایێ سالم سه‌عید تاهر به‌رپرسێ راگه‌هاندن و په‌یوه‌ندییان و ئه‌كره‌م سالح به‌رپرسێ كه‌مپێ ڤه پێشوازی لێ هاته كرن و سوپاسیا جه‌ماوه‌رێ لقێ هه‌ڤده یا پارتی كر بو هاریكاریكرنا ئاواره‌یێن كه‌مپا دومیز یا كوردێن روژئاڤا.
ژلایێ خوڤه سه‌ربه‌ست بابیری به‌رپرسێ لقێ د په‌یڤه‌كێدا گوت ئه‌ڤه نه ئێكه‌م جاره لقێ هه‌ڤده و جه‌ماوه‌رێ ده‌ڤه‌را شنگالێ ڤان ره‌نگه هاریكاریان پێشكێش دكه‌ت و نابیته دویماهیك جار ژی چونكه ئه‌م وان وه‌ك برایێن خو دزانین نه وه‌ك ئاواره و پێدڤیێن وان پێدڤیێن مه‌نه و مه دگه‌ل رێڤه‌به‌ریا كه‌مپا دومیز هه‌ماهه‌نگیه‌كا باش هه‌بویه بو هندێ بزانین چ پێدڤییه،هه‌روه‌سا مویه‌سه‌ر حه‌جی سالح قائیمقامێ قه‌زا شنگالێ د په‌یڤه‌كێدا سوپاسیا خه‌لكێ شنگالێ كر بو هه‌ستا وان یا بلند و نیشتیمان په‌روه‌ری و مروڤایه‌تی بو هاریكاریكرنا وان ئاواره‌ییان.
