بەرپرسێ لقێ ١٨ : ئەگەر هەمی ئەندام و لایەنگرێن پارتی ژ گەنج و پێر و ئافرەتان پشکداریێ د دەنگدانێ دا بکەن دێ زورینەیێ ئینین
قەدشKDP.info/ دسمینارەکێدا بهەلکەفتا سالڤەگەرا شورەشا ئەیلولێ هەردوو ئەندامێن ژورا هەلبژارتنان ل سنورێ لقێ هەژدە فریق فاروق بەرپرسێ نها یێ لقێ و محمد محسن بەرپرسێ بەرێ یێ لقێ سمینارەک پێشکێشی هژمارەکا زور ژ پێشمەرگێ ئەیلول وگولانێ کر یێن سەرب لیژنێن ئامێدیێ و سەرسنکێ و بامەرنێ ل هولا بێناتا – قەدش ل روژا شەمبی رێکەفتی ١٤/٩/٢٠١٣ و تێدا زێدەباری ئاماژەدان ب رولێ پێشمەرگەی بەحسێ هەلبژارتنان هاتکرن و تەکەز کر کو ل وی دەمی پێشمەرگە دێ خودان رێزبیت دەمێ سەروک بارزانی سەروکێ هەرێمێ بیت و پارتی حکومەتێ پێکبینیت و ئەڤرو پارتی ژ هەمی دەمەکی بهێزترە و ئەگەر هەمی ئەندام و ولایەنگرێن پارتی پشکداریێ د دەنگدانێ دا بکەن دێ زورینەیێ ئینین.
پشتی خولەکەک راوەستان رێزگرتن بو گیانێ شەهیدان و سەرکاروانێ وان بارزانیێ نەمر و ئیدریسێ هەردەم ساخ، فریق فاروق بەرپرسێ لقێ بەحسێ شورەشا ئەیلولێ ب سەرکرداتیا بارزانیێ نەمر کر،زێدەباری شورەشێن بەری و لدووڤدا . پاشی بەحسێ هەلبژارتنان هاتەکرن و گوت (پێشمەرگە نەبەس ئەون کو دەنگێ خو ددەن ....پێشمەرگە ئەون یێن داستان تومارکرین و بەردەوام خوینێ ددەن ...بەرەڤانیی ژ کوردستانێ دکەن ...دەسکەفتان دپارێزن، وەک جەنابێ شێخ ئەدهەم بارزانی بەری نها دگوت ئەم نەهاتینە داخازێ ژ هەوەبکەین دەنگ ب پارتی بدەن ژبەرکو هەوە ب کریارێن مەزنتر پارتاتیا خو سەلماندیە و بخوین هەوە دەنگ دایە پارتی ورێبازا بارزانی و چ گومان د دەنگدانا هەوەدانینە، بەلێ فەرە بیر بکەین کو بو ئەڤرو دەنگدان گەلەک یا گرنگە، بەری نها مە شەرێ مان و نەمانێ دکر و مە دروشمێ یان کوردستان یان نەمان بلندکربو، ئەڤرو ئەم ژ وێ قوناغێ دەربازبوینە و مە کوردستان گەشکریە بەلی مە دروشمەکێ دیتر بلندکریە ئەوژی بەرەف کوردستانەکا گەشتر . ب خوراگریا پێشمەرگەی و سەرکرداتیا بارزانی گەش بویە . ئاڤەدان بویە بەلی دێ گەشتر لێ کەین.
د بەردەوامیا پەیڤا خودا بەرپرسێ لقێ ئاماژەدا ئاخفتنا سەروکی دەمێ دبێژیت پێشمەرگە پەیڤەکا مەزنە، زێدەتر گوت هەتا سالا ١٩٧٥ێ چ حزبێن دی نەبون و هەر پارتی بتنێ بو د قادا خەباتێ دا و بارزانی بوو سەرکێش و سەرکردە، ئەڤرو ئەوێ حزبا ٦٧ سالان خەباتکری بەرهەم ئینایە . بەرهەم سەرهلدانە . بەرهەم پەرلەمانە . بەرهەم حکومەتا هەرێمێ و ئەڤدانی و پێشکەفتن و پەیوەندیێن نیڤدەولەتینە. بەرهەم ئالایە، پێتڤییە ئەف دەسکەفتە بهێنە پاراستن، لەوما دەنگدان یا گرنگە، ژبەر هندێ ئەوێ ئەف دەسکەفتە بدەستڤەئیناین ئەو دێ پارێزیت ژی ..دا کەسەک یان لایەنەکێ دی نەهێت یێ خوهەک بو ڤان دەسکەفتان نەدای کو بێ گومان پارزاستنا وان ژی بو وی خەم نابیت، بێ گومان مە چەند خەبات کریە ژبو بدەستڤەئینانا ڤان دەسکەفتان مە هند خەبات دڤێت ژبو پاراستنا وا و گەهشتن ب دەولەتبوونێ).
دیسان بەرپرسێ لقێ ئاماژەدا ئیسلاما سیاسی کو هەردەم گرێدای ئەجندایێن دەرەکییە و ل دەمێن تاوان بسەرێ گەلێ مەدا دهاتن چ لایەنێن سیاسی و ژوان ئیخوانا جیهانێ نەبتنێ بێدەنگ ما بەرامبەر ڤان تاوانان بەلکو پشتگیری و دەستخوشی ل سەدام دکر . دیسان گوت پشتی ١٩٩١ێ وەک پروسەکا دیموکراسی مە هندەک کرن شریک کو چ رەنج و خەبات نەکری و هەر پشتی هەلبژارتنێن ١١٩٢ یێ ئەڤە ئێکەم جارە هەر حزبەک بتنێ پشکداریێ د هەلبژارتنان دا دکەت و دڤێت سەنگا خو بزانیت و بێ گومان ئەڤرو هەمی حزب و لایەن د ئاریشە و پارچەبوون و کێم بوونێ دانە . تنێ پارتی نەبیت کو ئەڤرو ژ هەمی دەمەکی خورتتر و بهێزترە ژ هەمی ئالیانڤە رێکخستن، سیاسی، دارایی و ...هتد، بێ گومان ئەگەر هەمی ئەندام و رێکخستی ولایەنگرێن پارتی ژ گەنج و پێر و ئافرەتان بێ جوداهێ پشکداریێ د دەنگدانێ دا بکەن دێ زورینەیێ ئینین و دێ شێین بتنێ حکومەتێ پێکئینین و مە باوەری ب خەلکێ خو هەیە و بێ گومان ل داویا هەلبژارتنان دێ ئاهەنگێن سەرکەفتنێ بهەڤرا گێرین.
و لداویێ بەرپرسێ لقێ ئاماژە دا چەوانیا دەنگدانێ و ئەگەهداریا هەمیان کر د هشیاربن ژ خاپاندنێ.
ل دووڤدا محمد محسن بەرپرسێ بەرێ یێ لقێ١٨ چەند پەیڤ وشیرەت ئاراستەی بەرهەڤبویان کرن و گوت (ئەگەر خەلکێ دی شانازیێ ب پارتی و شورەشێن وێ ببەت پێتڤییە ئەم خەلکێ دەڤەرا ئامێدیێ ژ هەمیان پتر شانازیێ بەین و ب پارتا خو بزانین ژبەرکو خەلکێ مە پشکداریا راست ودروست د هەمی شورەشان داکریە و هەر ژ سەردەمێ شێخ عبدالسلام بارزانی و شێخ احمد بارزانی و تا ئەڤرو و هەتا ل پارچین دی یێن کوردستانێ مینا کومارا مهاباد پێشمەرگێن مە ب هەیڤان ژ مالێن خو دویر دکەفتن و شەهیدبوون لدەف گەلەک یا سروشتی بوو .
دیسان گوت ئەگەر ل ڤان داویان هندەک ژ ناف پارتی چبن وگەهشتبنە لایەنەکێ دی پێتڤییە بزانین چونا وان ژبەر دوو ئەگەرایە یان ژبەر وێ ئازادی و دیموکراسیێ یە یا ئەڤرو ل کوردستانێ و ئەڤە ژی تشتەکێ سروشتییە حزب هەبن یان ژبەر کێم و کاسی و خەلەتیێن مەیە، بێ تورەیی پێتڤییە دەستێ خو بسەریدابەین و ڤەگەرینینە ڤە بو ناف رێزێن پارتی، پێتڤییە ئەم هەمی کار بکەین کو خوینا شەهیدان ب هەرەوە نەچیت ئەڤێن ژ پارتی ڤەبوین کور و کچ و بسمام و خارزا و خزمێ من و تە و یێ دییە ژ بەر کێماسیەکێ چوینە یان ژی هاتینە خاپاندن .
دیسان ئاماژەدا ئیسلاما سیاسی و هەلویستێ ئیخوانان ل مسرێ بەرامبەر گەلێ مە و بەرەڤانیکرنا هندەکا لڤێرە ژوان و دوپاتکر کو گەلێ مە بخو یێ دیندارە و سەرکردێن شورەشێن مە هەردەم شێخ و مەلا بوینە و مەلا موستەفا بارزانی نمونەکە، و تەکزکر کو ل وی دەمی پێشمەرگە دێ خودان رێزبیت دەمێ سەروک بارزانی سەروکێ هەرێمێ بیت و پارتی حکومەتێ پێکبینیت.
