لقێ ئێك ب هه‌لكه‌فتا بیره‌وه‌ریا شوره‌شا ئه‌یلولا مه‌زن به‌یاننامه‌ك به‌لاڤ كر
پارتی دیموكراتی كوردستان ب رێبەرایەتیا بارزانیێ نەمر مەزنترین شورەشا نیشتیمانی و نەتەوەیی ل 11ی ئەیلولا سالا 1961ێ هەلگیرساند، شورەشا ئەیلولێ بۆ ئومێدەكا ب هێز كو گەلێ كورد شیا رێزێن خۆ رێك بێخیت و هەمی پێكهاتێن جڤاكی و ئولی بێی جوداهی د ئێك سەنگەر دا كوم بكەت ب مەرەما بەرگری كرن ژ هەبوون و مافێن ڕەوا یێن خەلكێ كوردستانێ.
شورەشا ئەیلولێ ب شورەشەكا سەرانسەری یا هەر چوار پارچێن كوردستانێ دهێتە نیاسین، و ئەڤ شورەشێ بۆ ناڤەندا بەلاڤكرن و ب هێز كرنا هەست و هوشیارییا نەتەوایەتی و شورەشگێری ل سەرانسەری كوردستانێ.
ژ ئەنجامێ خەبات و بەرخودان و خوراگریا شورەشا ئەیلولێ و سیاسەتا راست و دروستا بارزانیێ نەمر حكومەتا عیراقێ نەچار كربوو دانپێدانێ ب چەندین مافێن گەلێ كورد بكەت و رێكەفتنا 11ی ئادارێ ب مەزنترین دەستكەفتێ ڤێ شورەشێ دهێتە هژمارتن.
كەلتورێ پێكڤە ژیانێ و سەقامگیریا سیاسی و ئاشتی و دیموكراسی بۆ عیراقێ ژ ئارمانجێن شورەشا ئەیلولێ بوویە. ل سەر ئاستێ نیڤ دەولەتی ژی شورەشا ئەیلولێ شیا كێشا كوردی ب جیهانێ بدەتە نیاسین.
حكومەت و پەرلەمان و سیستەمێ دیموكراسی و هەلبژارتنێن ئەڤرۆ یێن ئازاد وگرێدانا كونگرێ نەتەوەیی ل هەرێما كوردستانێ ژ ئەنجامێ خەبات و قوربانی دانا هەردوو شورەشێن ئەیلولا مەزن و گولانا پێشكەفتنخواز و خەلكێ نیشتیمان پەروەر وەرێ كوردستانێ و ژ ئەنجامێ سیاسەتا دروستا پارتی و سەروك بارزانی یە بوویە.
ل یادا شورەشا ئەیلولا مەزن سلاڤ ل پێشمەرگێن قەهرەمان و تەڤایا شەهیدێن رێیا رزگاریخواز یا كوردستانێ و سەروەرێ وان بارزانیێ نەمر و ئدریسێ هەردەم ساخ.
لقێ ئێك
پارتی دیموكراتی كوردستان
10/9/2013
