ژورا هەلبژارتنێن پارتی ل سنورێ لقێ ١٨ دگەل کەسایەتی وخەلکێ دەڤەرا ئامێدیێ جڤیا
د چارچوڤێ هەوا بانگەشا هەلبژاتناندا ژورا هەلبژارتنان ل سنورێ لقێ ١٨ی پارتی دیموکراتی کوردستان روژا سێشەمبی رێکەفتی ١٠/٩/٢٠١٣ ل هولا سەنتەرێ رەووشەنبیریێ ئامێدیێ دگەل هژمارەکا زور ژ کەسایەتی ونوێنەرێن خەلکێ دەڤەرێ جڤیا .
پشتی خولەکەک رێزگرتن بو گیانێ پاکێ شەهیدان و سەر کاروانێ وان بارزانیێ نەمر و ئدریسێ هەردەم ساخ هێژا فەریق فاروق بەرپرسێ لقێ بخێرهاتنا مێهڤانان کر و ب درێژاهی لدور شورەشێن بارزان وئەیلول و گولانێ وسەرهلدانێ و دامەزراندنا پارتی و خەباتا بەردەوام دا و ئاماژدا خەباتا بنەمالا بارزان هەر ژ سەردەمێ شێخ عبدالسلام بارزانی ولدووڤدا شێخ احمد بارزانی و پاشی مەلا مستەفا بارزانی کو بویە هێما و بابێ روحی یێ گەلێ کورد ب سەرکردایەتیا خو یا جهێ شانازیێ.
دەربارەی هەلبژارتنان بەرپرسێ لقێ تەکەز کر کو ڤان هەلبژارتنان گرنگیەکا تایبەت هەیە و پێتڤییە ب هەمی شیانان هەمی پێکڤە کار بو بکەین و رێژا هەری مەزن بدەستڤەبینین ژبو وێ چەندێ بشێین حکومەتێ دروستبکەین و بەردەوامێێ بدەینە ئاڤاکرن و پێشڤەبرنا کوردستانێ تا دگەهینیە قوناغێن باشتر، کەرتێ نەفتێ کرە نمونەک بو پەیداکرنا پالپشتیا نیڤدەولوەتی بو کورد و کوردستانێ و ببیتە ئەگەرێ خوشگوزەرانیا وەلاتیان.
بەرپرسێ لقێ ئاماژە دا هەلبژارتنێن ١٩٩٢یێ و گوت ئەگەر ل ئێکەم هەلبژارتن پارتی ٥١% یا دەنگان ئینابیت ئەڤرو پارتی بهێزترە و ب ئانەهیا خودێ و پشتەڤانی و پشکداریا هەوە دێ جارەکا دی رێژا ژ هەمیان پتر ئینین و پێتڤییە بو ڤێ کار بکەین.
ژلایێ خوڤە هێژا محمد محسن بەرپرسێ بەرێ یێ لقێ ١٨ ئاماژە دا ئەرکێ هەر وەلاتیەکێ دلسوزێ رێبازا بارزانی و پارتی چ کادرێ حزبی بیت یان ئەفسەر وپلەدارێ لەشکەری بیت یان فەرمانبەربیت یان د هەر کارەکێ دی دابیت هەر ئێک ل جهێ خو و ل گەرەکا خو دناڤ خەلکێ خودا کاربکەت و هاندانا هەمیان بکەن لروژا هەلبژارتنان کەس نەمینیت پشکداریێ نەکەت و دەنگ ب پارتی بدەن و ئاماژە دا گرنگیا دەنگێ هەر تاکە کەسەکێ کو دبیت ژ ئەگەرێ دەنگەکی یان چەند دەنگان کاندیدەک نەدەرکەڤیت.
