شێخ ئەدهەم بارزانی :- خەلکێ ڤێ دەڤەرێ ب خوین و ئاوارەبوون ب کریار دەربرین ژ پارتیاتییا خو کریە
رێزدار شێخ ئەدهەم بارزانی ئەندامێ سەرکردایەتیا پارتی دیموکراتی کوردستان و سەرپەرشتێ میحوەرێ قەزا ئامێدیێ د هەوا بانگەشا هەلبژارتنان دا ، ب بەرهەڤبوونا هێژا فریق فاروق بەرپرسێ لقێ ١٨ی (پ.د.ک) دگەل هژمارەکا ماموستایێن ئاینی ل سنورێ لقێ ١٨جڤیا و سمینارەک پیشکێشی کر لروژا شەمبی رێکەفتی ٧/٩/٢٠١٣ ل هولا لقێ.
د سمینارا خودا بەرێز پەرپرسێ میحوەری مەرم ژ هاتنا خو بو دەڤەرێ دیارکر کو ئەو ژلایێ سەروک بارزانی و سەرکردایەتیا پارتی ب ڤی کاری هاتیە راسپاردن و دوپاتکر کو جەنابێ وی گەلەک پێخوشتر بوو ئەگەر هەردەم یان بو ماوەکێ درێژ بەری هەلبژارتنان و ل داوییا هەلبژارتنان ل دەڤەرێ کارکربوو نە بتنێ بو بانگەشا هەلبژارتنان ، زێدەتر خویا کر کو دبەرنامێ وی دا یە دگەل هەموو تەخ وچینێن جڤاکی بجڤیێت .
لدویڤدا ئاماژە ب رول و ئەرکێن ماموستا و زانایێن ئاینی دا دناڤ جڤاکی دا ، و داخاز ژێ کر راستییان ب گەهینن گەنج ولاو هەمی تەخێن جڤاکی ، بو دیارکەن ئەف تەناهی و ئازادی و پێشکەفتنە چاوان پەیدا بووینە و کیژ لایەنە خەبات بو کری کو هەر ئەو لیستە دێ شیت خزمەتێن باشتر پێشکێش کەت بەلێ ب پشتەڤانیا خەلکێ خو و دەنگدانا وان بو لیستا (١١٠) ، و ئاماژە ب بەرنامێ لیستا ١١٠ دا و ب بەرنامەکێ بەرفرەهـ و تەڤگر وەسفکر ودوپاتکر کو لسەر دەستێ ڤێ لیستێ گورانکاریێن مەزن دێ هێنە ئەنجامدان دبوارێ خوشگوزەرانییا خەلکی دا.
دەربارەی لایەنگرییا دەڤەرێ تەکەز کو خەلکێ ڤێ دەڤەرێ ب خوین و ئاوارەبوون و ب کریار دەربرین ژ پارتیبوونا خو کریە لەوما یا بساناهی نینە کەسەک داخواز ژێ بکەت دەنگ بو پارتی و لیستا ١١٠ بدەن ژبەرکو وان ب خوین ئەڤ چەندە سەلماندییە و دلسوزیا خو بو بارزانی و پارتی دوپاتکریە و گوت هوین ئەو چیانە یێن ل پشت پارتی .
دەربارەی بلندبوونا هندەک ئالایێن ئالیێن دن ل دەڤەرێ گوت هەر چەندە ئەڤە پروسەکا دیموکراسییە و رامانا ئازادیێ یە بەلێ ل هەمان دەم جهێ پرسیار و تەعەجوبێ یە و دبیت شاشیێن خو بخویی بن.
دیسان گوت هەرچەندی سنورەکێ سروشتی دناڤبەرا ڤێ دەڤەرێ ودەڤەرا بارزان دا هەیە بەلێ چ جاران رووبارێ شین ب درێژی و بوشیا خو نەشیایە ڤان هەردوو دەڤەران ژێک جودا بکەت .
لدووڤدا بەحسێ پەیدابوونا ئیسلاما سیاسی کر و بوهارا عەرەبی و ئەو هوکارێن بوینە هویێن رابوونا خەلکی ل دژی دەستهەلاتان ل چەندین وەلاتان و جارەکا دی ل دژی حوکمرانیا مورسی ل مسرێ هەر چەندە وی خەلکی بخو ئینا بوو سەر دەستهەلاتێ و خویاکر کو ئەڤا حزبێن ئیسلامی دبێژن خزمەتا دینی و مللەتێ کورد نینە بەلکو خزمەتا هندەک بیروباوەرایە کو شکەستن ئینایە.
بەرێزی خویاکر کو ل بەرامبەر هەوێن وێرانکرنا کوردستانێ و قرکرنا خەلکێ وێ ب ئەنفال و کیمیا بارانێ ،چ جاران چ ژ کەسایەتیێن ناڤدار یان لایەنێن سیاسی یێن ئیسلامی هەلویست بەرامبەر نەوەرگرت و ل دژی وێ نەراوەستان و نە گوتە سەدام یان غەیری وی تو بو ڤێ دگەل مللەتەکێ موسلمان دکەی ، وەک نمونە ئاماژە ب تاوانا ل دژی هەژارێن گوندێ روبوسکی کر کو چەندین وەلاتیێن کوردێن سڤیل و زاروک تێدا هاتن کوشتن کەسێ چ روندک بو نە رێتن بەلێ دەمێ کچا ئێک ژ سەرکردێن ئیسلامی یێن عەرەب ل مسرێ هاتیە کوشتن هندەک بەرپرسێن تورکا بو دکرە گری.
