لقێ ئێك ب هه‌لكه‌فتا ئه‌نفالێن به‌هدینان به‌یاننامه‌ك به‌لاڤكر
ئەنفالێن بەهدینان ل 25/8/1988ێ ئێك ژ كارەساتێن هەرە مەزن بوویە ژ لایێ رژێما بەعسا گوربەگور ڤە هاتیە ئەنجامدان دژی خەلكێ كوردسانێ، و بزاڤا ئازادیخوازا گەلێ كورد.
ژ ئەنجامێ خەباتا و بەرخودانا گەلێ مە دۆژمنێن شوفینست هەمی پیلان و شێوازێن قركرنێ بكار ئیناینە مینا كیمیاباران و كاڤل كرن و ئەنفال و جینوسایدێ ب مەرەما ژناڤبرنا نفشێ كورد. ئەنفالێن بەهدینان ژ كارەساتێن پڕ قوربانی و مال وێران كرنێ بوویە كو ب سەدان خەلك هاتنە شەهید و برینداركرن وچەندین گوند وسروشتێ كوردستانێ كەفتنە بەر هێرش و بومبەبارانكرنێ، و ب هزاران ژ خەلكێ دەڤەرێ هاتنە دەستەسەركرن و ل باشورێ عیراقێ تا نوكە د بێ سەروشینن.
سەرەرایی كارەسات و سیاسەتا هوڤانە یا رژێما ژ نافچوویی گەلێ كورد ژ دۆزا خۆ یا ڕەوا بێ ئومێد نەبوو، و بەردەوامی ب خوراگری و خەباتێ دا تا كو سەرهلدانا پیرَوزا 1991ێ و ئازادكرنا باشورێ كوردستانێ ب دەست ڤە هاتی، و گەلێ مە بوویە خودان حكومەت و پەرلەمان و هەرێمەكا ئازاد، هەژی ئاماژەپێدانێ یە دەستكەفتێن ئەڤرۆ ژ بەرهەمێ سیاسەتا راست و دروستا بارزانیێ نەمر و هەلویستێن نەگور و وەلات پارێزیێن سەرۆك بارزانی یە و شەهید و قوربانی دانا تەڤایا خەلكێ كوردستانێ یە.
تا ئەڤرۆ ژی دوژمنێن گەلێ مە د بەردەوامن ل سەر پیادەكرنا سیاسەتا رەگەزپەرستی و دویر ژ رێبازێن ئاشتیانە و دیموكراسیێ سەرەدەریێ دگەل نەتەوێ كورد دكەن ل پارچێن دی یێن وەلاتێ مە وەك روژئاڤایێ كوردستانێ كو ئەڤرۆ ب هزاران هاولاتیێن كورد دبنە قوربانیێن هێرشێن دوژمنان و دەربەدەر دبن.
جهێ شانازیێ یە ئەڤرۆ سەروك بارزانی و خەلكێ شەرفمەندێ كوردستانێ وەك ئەركەكێ نەتەوەیی و مرۆڤایەتی پێشوازیێ ل برایێن خۆ یێن كوردێن رۆژئاڤا دكەن و ژ هەمی لایەكی ڤە د هاریكارن بۆ دابینكرنا ئارامی و پێداویستیێن ژیانێ.
سەربەرزی بۆ گیانێ شەهید و قوربانیێن ئەنفالا بەهدینان و تەڤایا شەهیدێن رێیا رزگاریخوازا كوردستانێ و سەر كاروانێ وان بارزانیێ نەمر و ئیدریسێ جوانەمەرگ.
لقێ ئێك
پارتی دیموكراتی كوردستان
24/8/2013
