سه‌ربه‌ست له‌زگین بۆ قوتابیێن ئه‌كادیمیا كادران: جڤاكێ نیڤده‌وله‌تى وه‌كو پێدڤى خۆ ل جینوسایدا كوردان نه‌كریه خودان
زاخو - KDP.info/ سه‌ربه‌ست له‌زگین به‌رپرسێ لقێ 8ێ پارتى دیموكراتى كوردستان، ئه‌ڤرۆ سمیناره‌ك ل دۆر (جینوساید و یاسایێن نیڤ ده‌وله‌تى) بۆ قوتابیێن خولا 18ێ یا ئه‌كادیمیا كادران یا پارتى پێشكێشكر.
سه‌ربه‌ست له‌زگین به‌رپرسێ لقێ 8ێ پارتى ل زاخۆ د سمینارێ دا خۆیاكر كو جینوساید تاوانه‌كا دێرینه د مێژوویا مروڤایه‌تیێ دا لێ زاراڤه‌كێ نوى یه د یاسایێن نیڤ ده‌وله‌تى دا و مێژوویا وێ ڤه‌گه‌راند بۆ سه‌رده‌مێ شه‌رێ جیهانى یێ دووێ و دیار كر كو پێنج جورێن جینوسایدێ هه‌نه ئه‌و ژى جینوسایدا جه‌سته‌یى، ئه‌ندامى، ئابورى، كه‌لتورى و یاسایى یه.
سه‌ربه‌ست له‌زگین د ته‌وه‌ره‌كێ دى دا باس ل وان بزاڤان كر یێن هاتینه ئه‌نجام دان ژبۆ رێگرتن ل هه‌مبه‌ر ڤێ تاوانێ و گوت: داكو رێ ل ڤێ تاوانێ بهێته گرتن نه‌ته‌وه‌یێن ئێكگرتى په‌یماننامه‌كا تایبه‌ت ده‌رباره‌یى جینوسایدێ ل سالا 1948 گرێدا و گه‌له‌ك تایبه‌تمه‌ندى دایه جینوسایدێ و پێنج كریار ده‌ست نیشان كرن كو هه‌ر كه‌س و لایه‌نه‌ك ڤان كریارا ئه‌نجام بده‌ت دێ ل سه‌ر تاوانا جینوسایدێ هێنه سزادان.
سه‌ربه‌ست له‌زگین گۆت ژى؛ هه‌مى جورێن جینوسایدێ دژى ملله‌تێ كورد هاتینه ئه‌نجام دان و جڤاكێ نیڤ ده‌وله‌تى وه‌كو پێدڤى خو ل جینوسایدا كوردان نه‌كریه خودان لێ ل ڤان سالێن دووماهیێ هه‌ول و بزاڤێن حكومه‌تا هه‌رێمێ ژبۆ ناساندنا جینوسایدا كوردان ل ته‌ڤ جیهانێ تا راده‌یه‌كى جهێ خۆ گرتینه و نهو چه‌ند وه‌لاته‌كان دانپێدان ب جینوسایدا كوردان كریه و ئه‌ڤ چه‌نده ژى پشته‌ڤانیه‌كا باشه بۆ ملله‌تێ كورد.
