سه‌ربه‌ست له‌زگین بۆ هه‌لگرێن مه‌دالیا بارزانی: خه‌بات و ماندیبوونا هه‌وه‌ جهێ شانازیێ یه‌

زاخو-KDP.info/ سه‌ربه‌ست له‌زگین به‌رپرسێ لقێ 8ێ پارتی دیموكراتی كوردستان دگه‌ل هه‌لگرێن مه‌دالیا بارزانیێ نه‌مر ل سنورێ قه‌زا زاخۆ كومبوو.

به‌رپرسێ لقێ 8ێ پارتی د ده‌ستپێكا كومبوونێ دا خوشحالیا خۆ ب ڤێ كومبوونێ ده‌ربری و په‌سنا مێرخاسی و چه‌له‌نگیا هه‌لگرێن مه‌دالیا بارزانی كر و دووپات كر كو هه‌ر ده‌ستكه‌فته‌كێ ئه‌ڤرو ب ده‌ستڤه‌ هاتی ژ ئه‌نجامێ خوینا شه‌هیدان و پێشمه‌رگێن قه‌هره‌مانه‌ له‌ورا هه‌می ده‌مان پێشمه‌رگه‌یێن دێرین رێزه‌كا تایبه‌ت ل ده‌ف مه‌ هه‌یه‌ و خه‌بات و ماندیبوونا هه‌وه‌ جهێ شانازیێ یه.

د ته‌وه‌ره‌كێ كومبوونێ دا به‌رپرسێ لقێ روناهی به‌ردانه‌ سه‌ر ره‌وشا ناڤخۆیا كوردستانێ و نویتریت پێشهاتێن ده‌ڤه‌رێ و دیار كر كو ئه‌زموونا سیاسی یا كوردستانێ پێشڤه‌چوونه‌كا به‌رچاڤ ب خۆڤه‌ دیتی یه‌ و ئه‌ڤرۆ په‌یوه‌ندیێن مه‌ دگه‌ل زۆر وه‌لاتێن جیهانێ د ئاسته‌كێ باش دانه‌ و ئه‌ڤ چه‌نده‌ ژی بۆ سیاسه‌تا حه‌كیمانه‌یا سه‌رۆك بارزانی و سه‌ركردایه‌تیا سیاسی یا كوردی ڤه‌دگه‌ریت له‌ورا دڤێت ئه‌م هه‌می هاریكار و پشه‌ڤانێن ڤێ سیاسه‌تێ بین و گیانێ براینی و پێگڤه‌ژیانێ دناڤ خۆ دا خورتتر لێ بكه‌ین.

ل دیڤدا به‌رپرسێ لقێ باس ل كارێ رێكخستنا پارتی ل ده‌ڤه‌رێ كر و گوهداریا تێبینی و پێشنیارێن هه‌لگرێن مه‌دالیا بارزانی كر و دووپات كر كو بۆچوونێن وان جهێ پویته‌دانا پارتی نه.