پارتی گەلی تورکمانی: سەرکۆنەی هێرشەکەی سەر بارەگای سەرۆکی حکوومەت دەکەین

هەولێر-KDP.info- پارتی گەلی تورکمانی بە توندترین شێوە هێرشەکەی سەر بارەگای مەسروور بارزانی، سەرۆکی حکوومەتی هەرێمی کوردستان سەرکۆنە دەکات و بە هەڵکشانێکی مەترسیداری دەناسێنێت، هاوکات جەخت لە هاوپەیمانیی نەگۆڕی خۆی بۆ سەرۆکی حکوومەت دەکاتەوە و داوا لە بەغدا دەکات هەڵوێستی ڕوون بگرێتە بەر.

 
دەقی بەیاننامەکەی پارتی گەلی تورکمانی:

پارتی گەلی تورکمانی بە توندترین شێوە هێرشی فڕۆکەی بێفڕۆکەوانی بۆ سەر بارەگای بەڕێز مەسروور بارزانی، سەرۆکی حکوومەتی هەرێمی کوردستان، سەرکۆنە و ئیدانە دەکات و ئەم کردەوەیە بە هەڵکشانێکی مەترسیدار دەزانێت کە ئاسایشی هەرێمی کوردستان، سەقامگیریی عێراق و سەروەریی وڵات دەخاتە مەترسییەوە.
دووبارەبوونەوەی ئەم جۆرە دەستدرێژییانە، بە بەکارهێنانی ئامراز و شێوازێک کە سەرچاوە و ئاراستەکەی بۆ هەموو لایەک ناسراوە، نیگەرانییەکی جدی لە هەوڵەکان بۆ گواستنەوەی ململانێ و ناکۆکییە هەرێمایەتییەکان بۆ ناو خاکی عێراق دروست دەکات، هەوڵێک کە دەیەوێت عێراق و هەرێمی کوردستان بکاتە گۆڕەپانی ناردنی پەیام و یەکلاکردنەوەی حسابە سیاسی و ئەمنییەکان.
پارتی گەلی تورکمانی جەخت لەوە دەکاتەوە کە سەروەریی عێراق جێگەی سازش نییە و ئاسایشی هەرێمی کوردستان بەشێکی دانەبڕاوە لە ئاسایشی نیشتمانیی عێراق. پەیوەندییەکانی عێراق لەگەڵ وڵاتانی دراوسێ دەبێت لەسەر بنەمای ڕێزگرتنی بەرامبەر، دراوسێیەتیی باش و دەستوەرنەدان لە کاروباری ناوخۆی وڵات بێت، نەک بە زمانی هێز و هەوڵی سەپاندنی ئیرادە لە دەرەوەی سنوورەکان.
لە هەمان کاتدا، داوا لە حکوومەتی فیدراڵی عێراق و دەزگا ئەمنییە پەیوەندیدارەکان دەکەین هەڵوێستێکی ڕوون و یەکلاکەرەوە بەرامبەر ئەم دەستدرێژییانە بگرن، هەموو هەنگاوێکی پێویست بۆ ڕێگریکردن لە دووبارەبوونەوەیان بنێن و ڕاستی و وردەکارییەکانی ئەم هێرشە بۆ ڕای گشتی ئاشکرا بکەن. نابێت خاکی عێراق ببێتە گۆڕەپانێکی کراوە بۆ هیچ هەژموون و دەستوەرێکی دەرەکی کە بڕیاری سەروەریی دەوڵەت و دامەزراوە فەرمییەکانی پشتگوێ بخات.
ئێمە لە پارتی گەلی تورکمان  پشتیوانی و هاوپەیمانیی خۆمان بۆ بەڕێز مەسروور بارزانی دووپات دەکەینەوە و، وەک هاوپەیمانێکی وەفادار، نەگۆڕ و پتەو، لەسەر ئەو بەڵێنەین کە لە بەرامبەر هەر مەترسی و هەڕەشەیەک کە ئاسایش و سەقامگیریی هەرێمی کوردستان دەکاتە ئامانج،  شان بەشانی دەوەستین.
بەڕێز مەسروور بارزانی لە دیدی ئێمەدا نموونەی سەرکردەیەکە کە بە بەرپرسیارییەوە بۆ ئاوەدانی، گەشەپێدان و سەقامگیریی هەرێمی کوردستان کار دەکات؛ بۆیە هەر هەڕەشە و هێرشێک بۆ سەر کەس و پێگەکەی، تەنها هێرش بۆ سەر تاکێک نییە، بەڵکو هەوڵێکە بۆ لێدان لە ئاسایش و سەقامگیریی هەرێم.
هەروەها، بانگەوازی هەموو هێز و پێکهاتە سیاسی و نەتەوەییەکانی عێراق دەکەین، لە پێناو پاراستنی سەروەری و سەقامگیریی وڵاتدا هەڵوێستێکی یەکگرتوو بگرن و هەر هەوڵێک بۆ ڕاکێشانی عێراق بەرەو ململانێ هەرێمایەتییەکان، کە هیچ خزمەتێک بە بەرژەوەندیی گەلانی عێراق ناکات، بە تەواوی ڕەت بکەنەوە.

 عیرفان کەرکوکلی     

  سەرۆکی پارتی گەلی تورکمانی

١٧ی ئابی ٢٠٢٦